“Osiyo bolalari-2022”: ikkinchi kundan keyin O'zbekiston delegaciyasi nechanchi o'rinda bormoqda?

Ikkinchi kungi bellashuvlarida ham hamyurtlarimiz medallar jamg'arishdi.

-44 kg vazn toifasida bahs olib borgan yurtdoshimiz Zebiniso Hoshimjonova barcha raqiblarini mag'lub etib, musobaqa chempioniga aylandi. “Osiyo bolalari” musobaqasida ikkinchi oltin ham ko'p kuttirmadi. Yana bir taekvondochimiz SHamsiddin Qurbonov oltin medalga sazovor bo'ldi. -48 kg vazn toifasida jang qilgan Qurbonov barcha raqiblari ustidan ishonchli g'alabaga erishdi.

Laylo Zayniddinova “Osiyo bolalari” musobaqasida kumush medalga sazovor bo'ldi. -55 kg vazn toifasida mamlakatimiz sharafini himoya qilgan yurtdoshimiz, delegaciyamizga ikkinchi kumush medalni keltirdi.

Stol tennisi bo'yicha aralash juftlik bahslarida hamyurtlarimiz Iskandarov SHohruh va Ibodullaeva So'g'diyona tandemi ikkinchi o'rinni egalladi.

Daler Sufyanov suzish musobaqasining 100 metrga batterflyay usulda suzishda 56,67 natija bilan belgilangan masofani uchinchi bo'lib bosib o'tdi va bronza medaliga sazovor bo'ldi.

Kecha Asadbek Abdumalikov 200 metrga batterflyay usulda suzishda belgilangan masofani ikkinchi bo'lib bosib o'tib, “Osiyo bolalari” xalqaro sport o'yinlarining kumush medalini qo'lga kiritgan edi.

SHu tariqa, “Osiyo bolalari” xalqaro sport o'yinlarida hozircha O'zbekiston terma jamoasi hisobida 6ta medal, yani 2ta oltin, 3ta kumush va 1ta bronza bor.

“Osiyo bolalari” xalqaro sport o'yinlarida bugungi hamyurtlarimizning muvaffaqiyatli ishtiroklari bilan O'zbekiston kuchli beshlikda o'z o'rnini saqlab qoldi.

Eslatib o'tamiz, “Osiyo bolalari-2022” bahslarida 15 mamlakat, Rossiya Federaciyasining alohida 8 ta okrug va respublika jamoalarining 1350dan ziyod sportchi bolalari qatnashmoqda.