Osiyo xokkey federaciyasi mutasaddilari O'zbekistonda bo'lishdi

Kunning ikkinchi yarmida yurtimizda chim ustida xokkey sportining rivojlanishiga masul tashkilot hisoblangan “O'zkimyosanoat” AJ rahbariyati va ushbu tadbirda ishtirok etgan rasmiylar o'rtasida uchrashuv bo'lib o'tdi. Unda “O'zkimyosanoat” AJ rahbari Jo'rabek Mirzamahmudov Jismoniy tarbiya va sport vazirligi, MOQ, O'zbekiston chim ustida xokkey federaciyasi hamda Osiyo xokkey federaciyasi rahbariyati bilan uchrashuv o'tkazdi. Suhbat davomida ushbu sport turini yurtimizda yanada rivojlantirish, mamlakatimizda Olimpiya harakati va sog'lom turmush tarzini chim ustida xokkey misolida targ'ib qilish masalalari atroflicha muhokama qilindi. 

O'z navbatida Jo'rabek Mirzamahmudov uchrashuvda ilgari surilgan terma jamoalarimizning yangi maydonda o'tkaziladigan o'quv-mashg'ulot yig'inlarini tashkil qilish, ularning xalqaro musobaqalardagi ishtirokini taminlash kabi takliflarni qo'llab-quvvatlab, bu borada Jismoniy tarbiya va sport vazirligi hamda MOQ bilan hamkorlikda faoliyat olib borishga tayyor ekanligini takidladi.