Ot sporti. Toshkent viloyatida xalqaro turnir bo'lib o'tdi

O'zbekiston Respublikasi Jismoniy tarbiya va sport davlat qo'mitasi, mamlakatimiz ot sporti federaciyasi hamda Xalqaro ot sporti federaciyasi hamkorligida tashkil etilgan musobaqada O'zbekiston, Qozog'iston va Qirg'izistondan ellikka yaqin sportchi g'oliblik uchun kuch sinashdi.

Bo'stonliq tumanidagi “Allyur” ot sporti klubida o'tkazilgan musobaqaning yakkalik bellashuvlarida chavandozlar konkur – to'siqlardan ot sakratish yo'nalishi bo'yicha bahslashdi.

130 santimetr balandlikdan ot sakratish bo'yicha bahslarda Abdushukur Sobirjonov “Remteker” laqabli otida birinchi o'rinni egalladi. G'ayrat Nazarov “Kuatro Junior” laqabli otida ikkinchi, Xurshid Olimjonov “Giatris” nomli tulporida uchinchi bo'ldi.

Balandligi 135 santimetr bo'lgan to'siqlardan ot sakratishda “Ramiro” laqabli tulporida maydonga tushgan Azamjon Tolibboev g'alaba qozondi. Qirg'izistonlik Komil Sobitov “Kvintendro” laqabli otida kumush, yana bir chavandozimiz Oqil Sobirjonov “Demilion” laqabli otida bronza medalga loyiq topildi.

"Millatlar kubogi" jamoaviy musobaqasida chavandozlar 135 va 145 santimetr balandlikdan ot sakratish bo'yicha bahslashdi. Unda munosib ishtirok etgan Oqil Sobirjonov (“Samira”), Nurjon Tuyoqboev (“King Kornet”), Azamjon Tolibboev (“Ramiro”) va G'ayrat Nazarovdan (“Kuatro Junior”) iborat jamoamiz oltin medalni qo'lga kiritdi. Ikkinchi o'rin Qirg'iziston, uchinchi o'rin Qozog'iston terma jamoalariga nasib etdi.

Jahon kubogi bosqichi – Gran-pri bahslarida ham chavandozlarimizga teng keladigan raqib topilmadi. Balandligi 140 va 160 santimetr to'siqlardan ot sakratishda Nurjon Tuyoqboev “King Kornet” laqabli otida g'oliblikni qo'lga kiritdi. Oqil Sobirjonov (“Samira”) ikkinchi, G'ayrat Nazarov (“Kuatro Junior”) uchinchi o'rinni egalladi.

Bayram Aytmurodov