Ot zavodida OAV xodimlari uchun press tur tashkil etildi FOTOREPORTAJ

Mamlakatimizda yilqichilik va ot sportini rivojlantirish, uning moddiy-texnik va ozuqa bazasini mustahkamlash, mazkur soha uchun mutaxassislar tayyorlash va ularning malakasini oshirish, xorijiy davlatlarning ilg'or tajribalarini o'rganish orqali nasldor, sport va xizmat otlarini ko'paytirishga alohida etibor qaratilmoqda. 

«O'zbegim otlari» ot zavodi 1992 yilda tashkil etilgan bo'lib, maydoni 140 gektardan ortiq. Zavod qadimiy ot zotlari, jumladan, Axaltaka tulporlarini ko'paytirish va parvarishlashga ixtisoslashtirilgan. 

Tarixiy manbalarda keltirilishicha, Axaltaka zotli otlar bundan besh ming yil muqaddam paydo bo'lgan. U Osiyo xalqlarining yozma manbalarida samo tulporlari, arg'umoq, uchqur ayg'irlar, deya tariflangan. Toshbitiklar, qoyalarda saqlanib qolgan suratlarning guvohlik berishicha, Axaltaka arg'umoqlari qadimda hozirgi Farg'ona vodiysi, Xorazm viloyati hududlarida uchragan. Ayni paytda mazkur turning katta qismi Turkmaniston hissasiga to'g'ri keladi.

Bugungi kunda «O'zbegim otlari» zavodida 560 ta ot parvarishlanmoqda. Ular orasida Axaltaka zotidan tashqari, ingliz va arab zotli otlar ham bor. Ot zavodi faoliyati bilan tanishgan bir guruh jurnalistlar, shu erning o'zida Toshkent viloyati hokimi sovrini uchun o'tkazilayotgan ot poygasi musobaqasiga ham guvoh bo'lishdi.

2 yoshdan 8 yoshgacha bo'lgan tulporlar 1200 metrdan  2400 metrgacha bo'lgan masofaga ot choptirishdi.  Maqsad Ashurov, Alisher Ismatullaev, Nodir Muhammatullaev, Botir Yangiboev, Akmal Isomiddinov, Xusan Islomov, Aleksey Aleksandrov kabi chavandozlar g'olib va sovrindorlar safidan joy egalladi.

Suratlar muallifi - Alimurod MAMADAMINOV, o'z muxbirimiz