O'zbek taekvondosidan ajoyib yangilik: Terma jamoa Parij-2024 Olimpiya o'yinlari uchun beshinchi yo'llanmani ham qo'lga kiritdi, Nikita Rafalovich Olimpiadaga boradi!

Xalqaro Olimpiya qo'mitasining Parij-2024 Olimpiadasida ishtirok etadigan neytral maqomdagi rossiyalik sportchilar ro'yxatida taekvondochilar qayd etilmadi. Usi Katta dubulg'a turnirida licenziyalarni qo'lga kiritgan rossiyalik sportchilarning o'rniga, Olimpiya reytingida eng yaxshi o'rinlarni qayd etgan sportchilarga kvota taqsimlab berildi. Bu holatda +80 kg vazn toifasidagi reytingda oltinchi o'rinni qayd etgan hamyurtimiz, Tokio-2020 Olimpiadasi ishtirokchisi Nikita Rafalovich ham yo'llanmaga ega chiqdi.

Endilikda Parijdagi Olimpiadada taekvondo WT bo'yicha terma jamoamizning besh nafar sportchisi g'oliblik uchun kurash olib boradi.Bu O'zbek taekvondosidagi eng yaxshi natijadir. Boisi, shu paytgacha o'tkazilgan Olimpiya o'yinarida taekvondochilarimiz 4 tadan ziyod yo'llanmaga ega chiqmagan edi.

Parij-2024 Olimpiadasida yurtimiz sharafini himoya qiladigan sportchilarimiz:

Ulug'bek Rashitov (68 kg)

Jasurbek Jaysunov (80 kg)

Nikita Rafalovich (+80 kg)

Ozoda Sobirjonova (67 kg)

Svetlana Osipova (+67 kg).

Bundan tashqari, sportchilarimiz dunyoning eng kuchli uchta termasi qatorida Olimpiya o'yinlari tarixida ilk bor tashkil etilayotgan ko'rgazmali mikst dasturida ham ishtirok etishini alohida takidlash lozim.