O'zbekiston bo'ylab piyoda: Sirdaryolik ikki yigit Andijondan Mo'ynoqqacha piyoda borishga ahd qilishdi

O'zbekiston Respublikasi Prezidentining 2020 yil 30 oktyabrdagi “Sog'lom turmush tarzini keng tatbiq etish va ommaviy sportni yanada rivojlantirish chora-tadbirlari to'g'risida”gi Farmoni ijrosini taminlash maqsadida sirdaryolik ikki yurtdoshimiz butun O'zbekiston bo'ylab piyoda yurib o'tishga qaror qilishdi. 

Sirdaryo viloyati Sayxunobod tumanida istiqomat qiluvchi Eldorbek Jo'raev hamda To'lqin Usmonovlar Andijondan Mo'ynoqacha bo'lgan masofani, yani butun mamlakatimizni piyoda bosib o'tishga otlanishdi.

O'z yurishini shu yil 15 fevral kuni Andijon viloyatidan boshlagan bu ikki yigit bugun Farg'ona viloyati markaziga etib kelishdi. Qayd etish kerak, ushbu yurtdoshlarimiz boshlagan tashabbus Sirdaryo, Andijon, Farg'ona, Namangan viloyatlari Jismoniy tarbiya va sport boshqarmalari tomonidan qo'llab-quvvatlandi.

Xususan, Sirdaryo viloyati Jismoniy tarbiya va sport boshqarmasi E.Jo'raev va T.Usmonovni sport formalari bilan taminlagan bo'lsa, Andijon, Farg'ona, Namangan viloyatlari esa tashabbuskor yoshlarni kutib olish, yotoq joy bilan taminlash, kuzatish kabi masalalarda yordamlarini ayashmayapti. Qisqasi, Prezident Farmoni ijrosini taminlash maqsadida barcha birlashmoqda.