O'zbekiston Jahon chempionatining ikkinchi kunidan keyin peshqadamlar safida

Dunyoning 55 jamoasi ishtirok etayotgan ushbu nufuzli musobaqada O'zbekiston terma jamoasi ham kuchli tarkibda sovrinli o'rinlar uchun bahs olib bormoqda. Tarkibda Rustam Qosimjonov, Nodirbek Abdusattorov, Javohir Sindarov, SHamsiddin Vohidov singari etakchi grossmeysterlarimiz bor.   

Jamoaviy jahon chempionatining umumiy mukofot jamg'armasi 500 000 evro bo'lib, rapid uchun 310 000, blic uchun esa 190 000 evro ajratilgan. Musobaqaning ilk kuni rapid bo'yicha 4 ta tur uchrashuvlari o'tkazildi. Terma jamoamiz ikkinchi kungi bahslarda 2 g'alaba va 2 durang qayd etdi. 

Global Ramblers 5:1, Isroil terma jamoasi 4,5:1,5 hisobida mag'lub etildi. Malcolm's Mates va Hexamind jamoalari bilan 3:3 hisobidagi jangovar durangga imzo chekdik. Tarkibiga mashhur grossmeysterlarni jamlagan Hexamind jamoasiga qarshi bahsda Javohir Sindarov amaldagi chempion Volodar Murzinni, Nodirbek Abdusattorov esa Levon Aronyanni mag'lub etishni uddaladi. Rustam Qosimjonov va SHamsiddin Vohidov o'z partiyalarini durang bilan yakunlashdi. Afsuski, Afruza Hamdamova va Nilufarxon Imomqo'zieva raqiblariga yutqazib qo'yishdi. 

SHu tariqa, O'zbekiston terma jamoasi ikkinchi kungi bahslardan so'ng 5 g'alaba, 2 durang va 1 mag'lubiyat bilan 12 ochko jamg'argan holda qo'shimcha ko'rsatkichlarga ko'ra 4-o'rinni egallab turibdi. Uchinchi pog'onadagi Freedom jamoasi hisobida ham 12 ochko bor. Team MGD1 va Hexamind Chess Team jamoalari 13 tadan ochko jamg'arib, turnir jadvalida qo'shhokimlik qilishyapti. 

Bugun jahon chempionatining jamoaviy rapid bahslarida g'olib va sovrindorlar aniqlanadi. To'qqizinchi turda o'zimiz singari 12 ochkoga ega Germany and Friends jamoasiga qarshi bahs olib boramiz. Germaniya tarkibida Vinsent Keymer (2649), Mattias Blubaum (2596), Sven Rasmus (2616), Dmitriy Kollars (2553), Aleksandr Donchenko (2561) singari grossmeysterlar bor.