O'zbekiston klubi KXLda ishtirok etadimi? Olamsport.com aniqlashtiradi!

Olamsport.com sayti muxbiri Aziz To'xtamurodov ushbu xabar haqiqatga qanchalik yaqin ekanligini bilish maqsadida "Binokor" jamoasi bosh murabbiyi Alisher Azimov bilan aloqaga chiqdi.

"Ayni paytda mahalliy yoshlardan iborat jamoamiz bor. Ular poytaxtimizdagi muz saroylarining birida mashg'ulot olib borishyapti. Yigitlar Qozog'istondagi turnirlarda qatnashib kelishmoqda", - deya so'z boshladi Azimov.

Bundan bir necha oy muqaddam ijtimoiy tarmoq orqali chet elda xokkey bilan shug'ullanayotgan o'zbekistonliklarni jamoamizga jalb etish maqsadida elon bergandik. Ana shundan so'ng dunyoning turli mamlakatlaridan bizga murojaatlar bo'ldi. Ularning aksariyati ayni paytda Rossiyada xokkey bilan shug'ullanayotgan yurtdoshlarimiz edi. SHuningdek, AQSH, Belarus, Qozog'istonda yashab, xokkey o'ynayotgan vatandoshlarimiz ham "Binokor" sharafini himoya qilish istagini bildirishdi.  



"KXL? Albatta, bunday g'oya rejamizda bor. Barchasi "Xumo" arenasi ochilganidan so'ng aniq bo'ladi. Ochilish marosimida biz o'zbek xokkeychilarining nimalarga qodir ekanligini namoyish qilib bermoqchimiz. Maqsadimiz jiddiy. Nasib qilsa, o'zbek jamoasi Kontinental Xokkey Ligasida ishtirok etadi. Buning uchun yigitlarimizning kuch va iqtidorlari etarli.



Rejaga ko'ra shu yilning o'zidayoq O'zbekiston xokkey federaciyasi ochilishi kerak. Ana shundan so'ng biz Xalqaro xokkey federaciyasiga azo bo'lib, qita va jahon miqyosidagi turnirlarda ishtirok eta olishimiz mumkin", - dedi Azimov.

Malumot uchun:

Azimov Alisher Akramovich

1968 yil 10 oktyabrda Toshkent shahrida tug'ilgan.

- O'zbekistonda xokkeyni qayta tashkil etgan.

- "Binokor" xokkey klubi tasischisi

- "Binokor" xokkey klubi bosh murabbiyi.

O'z vaqtida "Binokor"ning bolalar sport klubida xokkey sir asrorlarini o'rgangan. CHet el xokkey ligalarida legioner sifatida o'ynagan.