O'zbekiston va Koreya Respublikasi sport aloqalari rivojlantiriladi

Avval Kvon Yon U janoblari mustaqillik yillarida o'zbekistonlik sportchilarning ajoyib g'alabalari haqida hikoya qiluvchi ekspoziciya va eksponatlar bilan tanishtirildi. So'ngra O'zbekiston va Koreya Respublikasi o'rtasidagi do'stona aloqalar, sport sohasidagi hamkorlik haqida samimiy suhbat bo'lib o'tdi.

Rustam Qurbanov mehmonni qutlar ekan, koreyalik sportchilarning nufuzli musobaqalardagi zafarlariga, mamlakat yirik sport anjumanlarini yuksak saviyada o'tkazish tajribasiga egaligiga etibor qaratdi, jumladan, 1988 yili Seulda yozgi olimpiya o'yinlari, XXI asrning avvalida Pusan va Inchonda Osiyo o'yinlari butun jahon sport jamoatchiligining tahsiniga sazovor bo'lganini, kelgusi yili navbatdagi qishki olimpiada Pxyonchxanda  muvaffaqiyatli o'tishiga shubha qilmasligini etirof etib, mamlakatlarimiz o'rtasida o'zaro manfaatli aloqalar sport sohasida ham samara berishini takidlab o'tdi. 

Kvon Yon U janoblari O'zbekiston tarixan qisqa davr – chorak asr mobaynida dunyo hamjamiyatida o'ziga xos o'rin egallab ulgurishida sportdagi g'alabalarning ham hissasi borligini, o'tgan yili Braziliyadagi olimpiya va paralimpiya o'yinlari vaqtida mamlakatimiz sportchilarining yutuqlaridan xursand bo'lganini, bugungi kunga kelib O'zbekiston Markaziy Osiyoda sport sohasida yaqqol etakchiga aylanganini qayd etdi, o'zbek va koreys xalqlarining sportni birdek sevishiga alohida etibor qaratdi. Koreyada sportni rivojlantirish borasida ko'plab ilmiy tadqiqotlar olib borilayotgani, texnologiyalar takomillashtirilayotganiga to'xtalgan elchi janoblari, o'z mamlakatidagi yutuqlardan o'zbekistonlik mutaxassislar ham foydalanishlari uchun, sport sohasidagi aloqalarni yanada mustahkamlash uchun ko'maklashishga tayyor ekanligini bildirdi. Pxyonchxandagi qishki olimpiada o'yinlarida O'zbekiston delegaciyasi ishtirok etishidan mamnun bo'lishini aytdi.

Suhbat davomida ommaviy sport, qishki sport turlarini rivojlantirish, sportchilar va mutaxassislar hamkorligi borasida fikr-mulohazalar almashildi. O'zbekiston jismoniy tarbiya va sport davlat qo'mitasi bilan Koreya Respublikasi sport vazirligi o'rtasida aloqalarni yanada faollashtirish maqsadga muvofiq ekanligi etirof etildi.

O'zbekiston jismoniy tarbiya va sport davlat qo'mitasi matbuot xizmati