O'zbekistonlik yosh shaxmatchilar jahon chempionatida ikkinchi o'rinni egalladi

Qirqdan ziyod davlat vakillari qatnashgan nufuzli musobaqaning standart shaxmat bo'yicha bahslarida terma jamoamiz azolari uchta oltin medalni qo'lga kiritdi, blic musobaqada esa bittadan oltin va kumush medalga sazovor bo'ldi. 

Standart shaxmat bo'yicha etti yoshgacha o'g'il bolalar o'rtasidagi bahslarda Humoyun Begmurodov to'qqiz partiyaning birontasida mag'lubiyatga uchramay, 8,5 ochko jamg'argan holda shohsupaning eng yuqori pog'onasiga ko'tarildi. Humoyun ruminiyalik Teodor Dodoy, Stefan Nika, turkiyalik Otabey Oyxon, gruziyalik Beka Cverava, ozarbayjonlik Ziyo Mammadov, qirg'izistonlik Sultay CHingiz, rossiyalik Lev Zverev va ukrainalik Mixayl Karateev ustidan g'alaba qozonib, mo'g'ulistonlik Ganganbars Zev bilan durang o'ynadi. 

O'n besh yoshgacha sportchilar bahsida shaxmatchimiz Nodirbek Yoqubboevga teng keladigani topilmadi. U shri-lankalik Denuvan Tikshana, turkmanistonlik Ozod Nurmamedov, Sulton Miradov, moldovalik Ilie Martinovichi, ruminiyalik Jorj Stoleriu, David Gavrilesku, ukrainalik Dmitro Gayunni mag'lubiyatga uchratib, ozarbayjonlik Murod Ibrohimli bilan durang o'ynadi. 7,5 ochko jamg'argan Nodirbek jahon chempionatining oltin medaliga sazovor bo'ldi. 

To'qqiz yoshgacha qizlar musobaqasi esa iqtidorli shaxmatchimiz Afro'za Hamdamova g'alabasi bilan yakunlandi. Afro'za to'qqiz partiyaning ettitasida g'alaba qozonib, bittasida durang natija qayd etdi va 7,5 ochko bilan maktab o'quvchilari o'rtasida jahon chempionligini qo'lga kiritdi. SHuningdek, A.Hamdamova blic turnirda ham birinchi o'rinni egalladi. 

To'qqiz yoshgacha sportchilar o'rtasidagi blic turnirda qatnashgan Alixon Avazxonov kumush medal bilan taqdirlandi. 

Umumjamoa hisobida terma jamoamiz azolari ikkinchi o'rinni egalladi.