Parij-2024 Olimpiadasida stol tennischilarimizdan hech kim bo'lmaydi

Afsuski, Markaziy Osiyo mintaqaviy saralash turniri yakunlanmasidan turib, O'zbekiston terma jamoasi stol tennischilari o'z ishtiroklarini to'xtatib bo'lishdi. Avvaliga qizlarimiz Rozalina Xadjieva va Marhabo Magdieva guruh bosqichidan chiqa olishmadi. Keyin esa yigitlarimiz omadsizlikka uchrashdi. 

Erkaklar o'rtasidagi bahslarda Rio-2016 Olimpiadasi ishtirokchisi bo'lgan Zohid Kenjaev hamda SHohruh Iskandarov 1/4 finalga yo'l olishgandi. Iskandarov eronlik Nima Alamyanga 0:4 (1:11, 9:11, 4:11, 9:11) hisobida imkoniyatni boy berib qo'ydi. Kenjaev esa 1/4 finalda qirg'izistonlik Azamat Ergashevdan 4:1 (11:5, 11:6, 8:11, 11:2, 11:3) hisobida ustun kelgandi. Ammo 1/2 finalda eronlik Noshad Alamyanga 0:4 (4:11, 9:11, 8:11, 4:11) hisobida yutqazib qo'ydi. 

Eslatib o'tamiz, erkaklar va ayollar o'rtasidagi turnirda faqat g'oliblargina Parij-2024 Olimpiadasi licenziyasini qo'lga kiritadi. Final uchrashuvlari bugun o'tkaziladi. 

Erkaklar o'rtasidagi finalda ikki eronlik stol tennischisi o'zaro to'qnash kelishini inobatga olsak, licenziya har qanday natijada ham fors yurtiga yo'l oladi. Ayollar o'rtasidagi finalda esa qozog'istonlik Sarvinoz Mirkadirova eronlik Neda SHahsavariga qarshi Olimpiada yo'llanmasi uchun bahs olib boradi.