Poland Rapid & Blitz. Nodirbek Abdusattorov Magnus Karlsenga qarshi o'yin o'tkazdi FOTO + JADVAL

Mukofot jamg'armasi 175 000 AQSH dollarini tashkil etuvchi ushbu musobaqada dunyoning kuchli 10 nafar grossmeysteri bosh sovrin uchun bahs olib boryapti. Ular orasida dunyo shaxmatchilar reytingida 5-o'rinni egallab turgan hamyurtimiz Nodirbek Abdusattorov ham bor. 

Kecha turnirning ikkkinchi kuni shaxmatchilar rapid yo'nalishida yana uchta partiyada o'zaro dona surishdi. Rapid yo'nalishidagi bahslarda g'alabaga 2, durangga 1 ochko beriladi. Ertaga o'tkaziladigan blic yo'nalishida esa g'alabaga 1, durangga 0,5 ochko taqdim etiladi. Turnir g'olibi esa 40 000 dollarga ega bo'ladi.   

Ishtirokchilar: Magnus Karlsen (Norvegiya, rapid 2828/blic 2886), Vey I (Xitoy, 2758/2684), Yan-Kshishtof Duda (Polsha, 2748/2766), Nodirbek Abdusattorov (O'zbekiston, 2733/2661), Rameshbabu Pragnanandha (Hindiston, 2704/2675), Anish Giri (Niderlandiya, 2687/2715), Arjun Erigaysi (Hindiston, 2671/2744), Dommaradju Gukesh (Hindiston, 2649/2651), Vinsent Kaymer (Germaniya, 2647/2610), Kirill SHevchenko (Ruminiya, 2622/2546).

Musobaqaning dastlabki kuni Nodirbek Abdusattorov niderlandiyalik Anish Giri va hindistonlik Dommaradju Gukeshni mag'lub etib, yana bir hind grossmeysteri Rameshbabu Pragnanandxaga imkoniyatni boy berib qo'ygandi. 

Nodirbek 4-turda germaniyalik Vinsent Keymer, 6-turda hindistonlik Arjun Erigaysi bilan durangga imzo chekdi. Beshinchi turda esa qora donalarda jahon chempioni, reyting peshqadami Magnus Karlsen bilan to'qnash keldi va bu safar norvegiyalik afsonaga yutqazib qo'ydi.    

Magnus Karlsen - Nodirbek Abdusattorov partiyasi

Oltinchi turdan so'ng turnir jadvalida Magnus Karlsen va Vey I 8 tadan ochko bilan qo'shhokimlik qilishyapti. Ruminiyalik Kirill SHevchenko va Rameshbabu Pragnanandha hisobida 7 tadan ochko bor. Abdusattorov, Gukesh va Erigayisi 6 tadan ochko bilan keyingi o'rinlarni band etishgan. Bugun rapid yo'nalishida so'nggi 3 ta partiya o'ynaladi.