PREVYU. Roland Garros 2019. Bugun FINAL: Grunt shahzodasi Qirolga qarshi!

Franciya poytaxti Parij shahri mezbonligida o'tayotgan turnirning so'nggi kuni muxlislar ikkitaga finalga guvoh bo'lishadi. Avvaliga ayollar o'rtasidagi juftlik musobaqasining final uchrashuvi o'tkaziladi. Keyin esa erkaklar o'rtasidagi yakkalik turnirida chempion aniqlanadi. 

Hal qiluvchi final uchrashuvida grunt, yani qum qoplamali kortlar qiroli Rafael Nadal ATP reytingining 4-pog'onasidan joy olgan avstriyalik Dominik Timga qarshi kortga chiqadi. Timga nisbatan grunt turnirlar shahzodasi tarif beriladi. 

Ispaniyalik tennis afsonasi uchun bu “Rolan Garros” turniridagi 15-mavsum hisoblanadi. Nadal 15 yillik ishtiroki davomida faqat ikki marta mag'lubiyat alamini totib ko'rgan. Bugun u 12-titulini qo'lga kiritish uchun urinib ko'radi. 2016 yilgi “Rolan Garros” turnirining uchinchi bosqichida u jarohati sabab hamyurti Marsel Granolersga qarshi kortga chiqmagan. Bu mag'lubiyatga kirmaydi. 

Nadal ilk bor Parijda 2009 yilgi turnirda mag'lubiyatga uchragan. Rafa kutilmaganda  to'rt set davom etgan bahsda Robin Syoderlingga imkoniyatni boy berib qo'ygan. Nadal bu yilgi “Rolan Garros”da birgina David Goffenga uchinchi davra uchrashuvida bitta setni yutib olish imkonini berdi, xolos. 

Grunt shahzodasi bo'lgan Dominik Tim so'nggi to'rt mavsumdan beri har yili bir marotaba Nadalni grunt turnirida mag'lubiyatga uchrata olyapti. Aynan shu holat bu yilgi finalga bo'lgan qiziqishni oshirgan. Hozircha o'zaro grunt qoplamali turnirlardagi hisob - 6:4, Nadal foydasiga. Ko'ramiz, bugun kimning ko'chasida bayram bo'lar ekan: Qirolnimi yoki uning vorisini?