Prezident Cup. Sindarov yana peshqadam, derbida SHamsiddin mag'lubiyatli vaziyatni g'alabaga aylantirdi, Abdusattorov esa...

Dunyoning ko'zga ko'ringan grossmeysterlari mukofot jamg'armasi 75 000 AQSH dollarini tashkil etuvchi Prezident Cup musobaqasi bosh sovrini uchun bahs olib borishyapti. Kecha 7-turning birinchi doskasida birinchi raqamli shaxmatchi Nodirbek Abdusattorov (2777) qora donalarda hindistonlik Puranik Abhimanyu (2682) bilan murosaga keldi. Nodirbek 5 ochko bilan hamon 6-o'rinni egallab turibdi. Ammo chempionlik uchun imkoniyatlari pasayib ketdi. 

Musobaqada 7-tur oldidan qo'shimcha ko'rsatkichlarga ko'ra yana 1-o'ringa ko'tarilib olgan Ortiq Nig'matov (IM, 2447) qora donalarda hindistonlik grossmeyster Nihal Sarin (2676)ga yutqazib qo'ydi va turnir jadvalida 5-pog'onaga pastladi. Sarin hisobidagi ochkolar 6 taga etdi va u qo'shimcha koeficentlarga ko'ra 2-o'ringa ko'tarilib oldi. 

Bu turda ham hamyurtlarimiz ishtirokidagi derbiga guvoh bo'ldik. So'nggi turlarni yaxshi o'tkazayotgan SHamsiddin Vohidov (2681) Nodirbek Yakubboev (2668)ga qarshi murosasiz bahsda mag'lubiyatni g'alabaga aylantirishga muvaffaq bo'ldi. Bu ularning o'zaro o'tkazgan 32-uchrashuvi bo'ldi. Qizig'i, ikkala grossmeysterimiz ham kechagi uchrashuvga qadar 10 tadan g'alabaga erishgandi. SHamsiddin kechagi g'alabasi evaziga hisobda oldinga chiqib oldi. Ular o'rtasidagi 11 ta partiyada kuchlar teng kelgan.    

Bir tur oldin Nodirbek Abdusattorov bilan durang o'ynagan Javohir Sindarov (2682) 7-turda hindistonlik Sankalp Gupta (2539) ustidan muhim g'alabaga erishib, turnir jadvalida 6 ochko bilan qo'shimcha ko'rsatkichlar evaziga 1-o'ringa ko'tarilib oldi. Turnirda ikkinchi raqam ostida tasniflangan eronlik taniqli shaxmatchi Parham Maqsudlu oq donalarda hind shaxmatchisi Nilash Saha (2458) bilan durang qayd etdi. Parham hisobida 5, Nilashda esa 5,5 ochko bor.