Prezident Kubogi. Markaziy partiyadagi durangdan keyin peshqadam o'zgardi

Dunyoning ko'zga ko'ringan grossmeysterlari mukofot jamg'armasi 75 000 AQSH dollarini tashkil etuvchi Prezident Kubogi musobaqasi bosh sovrini uchun bahs olib borishyapti. A guruhida qo'shimcha ko'rsatkichlarga ko'ra peshqadamlik qilib kelgan Ortiq Nig'matov (2447) 5-turda nafaqat O'zbekistonning, balki turnirning birinchi raqamli shaxmatchisi Nodirbek Abdusattorov (2777)ga qarshi oq donalarda o'ynadi va yakunda durangga imzo chekdi. 

Bu ikki shaxmatchimiz ochkolarini 4 taga etkazib olishdi va hamon mag'lubiyatsiz odimlashyapti. Peshqadamlarning ochko yo'qotishidan Javohir Sindarov (2682) unumli foydalanib qoldi. Grossmeysterimiz FIDE bayrog'i ostida harakat qilayotgan rossiyalik Ivan Zemlyanskiy (2543)ni mag'lubiyatga uchratib, 4,5 ochko bilan turnir jadvalida yakka karvonboshi bo'lib oldi. 

To'rtinchi turda Nodirbek Abdusattorovdan ochko tortib olgan Murali Kartekyan (Hindiston, 2625) bu safar vatandoshi Nihal Sarin (2676) bilan durang o'ynadi. Yana bir grossmeysterimiz Muhiddin Madaminov (2501) ikkinchi raqamli ishtirokchi Parham Maqsudlu (Eron, 2712)dan ochko tortib oldi. Ularning partiyasi durang bilan yakunlandi. SHamsiddin Vohidov (2681) 5-turda rossiyalik Aleksey Aleksandrov (2425)dan ustun keldi va sovrinli o'rinlar uchun kurashga qo'shildi. Nodirbek Yakubboev (2668) esa o'z singari 3 ochko to'plagan qozog'istonlik Aristanbek Urazaev (2480) bilan murosaga keldi. 

Oltinchi tur oldidan Javohir Sindarov 4,5 ochko bilan yakka peshqadam bo'lib oldi. Sakkiz shaxmatchi - Ortiq Nig'matov, Murali Kartikyan, Saha Nilash, Nihal Sarin, Nodirbek Abdusattorov, Sankalp Gupta, Vitaliy Bernardskiy va Saparmirat Atabaev 4 ochkodan jamg'arishgan. Abdusattorov qo'shimcha ko'rsatkichlarga ko'ra 6-pog'onadan joy olgan.