Prezident Kubogi. Nodirbek ilk bor ochko yo'qotdi, Sindarov derbida peshqadam bilan durang o'ynadi

Dunyoning ko'zga ko'ringan grossmeysterlari mukofot jamg'armasi 75 000 AQSH dollarini tashkil etuvchi Prezident Kubogi musobaqasi bosh sovrini uchun bahs olib borishyapti. A guruhida qo'shimcha ko'rsatkichlarga ko'ra peshqadamlik qilayotgan Ortiq Nig'matov (2447) bu turda grossmeyterimiz Javohir Sindarov (2682) bilan durang o'ynadi. Har ikki shaxmatchimiz hisobidagi ochkolar 3,5 taga etdi. 

To'rtinchi turga qadar ikkinchi o'rindan joy olgan turnirning birinchi raqamli shaxmatchisi Nodirbek Abdusattorov (2777) ketma-ket uchta g'alabadan keyin ochko yo'qotdi. U o'zi singari yuz foizlik natija qayd etib kelgan hindistonlik Murali Kartikyan (2625) bilan murosaga keldi. Nodirbekda g'alaba uchun yaxshigina imkoniyat yuzaga kelgandi, afsuski u kichik xato sabab bundan foydalana olmadi. 

Grossmeysterimiz SHamsiddin Vohidov (2681) 4-turda qora donalarda rossiyalik Artem Uskov (2430) bilan durang qayd etdi. Nodirbek Yakubboev (2668) oq donalarda qirg'izistonlik Eldiyar Orozbaevni mag'lubiyatga uchratdi va ochkolarini 3 taga etkazib oldi. 

Bugun o'tkaziladigan 5-tur oldidan turnir jadvalida Ortiq Nig'matov 3,5 ochko bilan qo'shimcha ko'rsatkichlarga ko'ra karvonboshilikni o'zida saqlab qoldi. Nodirbek Abdusattorovdan ochko tortib olgan Murali Kartikyan ikkinchi o'ringa ko'tarilib oldi. Nodirbekning o'zi uchinchi o'ringa tushdi. Hindistonlik Nihal Sarin, shuningdek, Javohir Sindarov rossiyalik Ivan Zemlyanskiy hisobida ham 3,5 ochkodan bor. 

O'n olti nafar ishtirokchi 3 ochkodan jamg'argan. Ular orasida hamyurtlarimizdan Ulug'bek Tillaev, Muhiddin Madaminov va Nodirbek Yakubbov ham bor. Turnirning ikkinchi raqamli ishtirokchisi eronlik taniqli grossmeyster Parham Maqsudlu 3 ochko bilan 14-o'rinni egallab turibdi.