Prezident Kubogi. "O'zbek klassiko"sida qanday natija qayd etildi? (Barcha natijalar+turnir jadvali)

Dunyoning ko'zga ko'ringan grossmeysterlari mukofot jamg'armasi 75 000 AQSH dollarini tashkil etuvchi Prezident Kubogi musobaqasi bosh sovrini uchun bahs olib borishyapti. Bugun 6-turning markaziy uchrashuvi 5-turdan so'ng peshqadamlikni qo'lga olgan Javohir Sindarov hamda musobaqaning birinchi tartib raqamli shaxmatchisi Nodirbek Abdusattorov o'rtasida o'tkazildi. Murosasiz kechgan bahsda tomonlar murosaga kelishdi va o'z hisoblariga yarim ochkodan yozib qo'yishdi.  

Nodirbek Abdusattorov va Javohir Sindarov o'zaro 27 marotaba to'qnash kelishdi. SHundan 9 tasida Nodirbek, 7 tasida Javohirning qo'li baland kelgan. Bugungisi bilan qo'shib hisoblasak, 11 ta partiyada durang natija qayd etilgan. 

Musobaqani ko'tarinki ruhda o'tkazayotgan Ortiq Nig'matov (2447) peshqadamning ochko yo'qotishidan unumli foydalanib qoldi. U qora donalarda o'ynashiga qaramay, eronlik grossmeyster Amin Tabatayi (2686)ni mag'lubiyatga uchratdi. Amin turnirda beshinchi raqam ostida saralangan edi. Nig'matov 5-turda Nodirbek Abdusattorov (2777) bilan durangga imzo chekkandi. 

Yana bir o'zbek derbisida Muhiddin Madaminov (2501) va SHamsiddin Vohidov (2681) o'zaro hisob-kitob qilishdi. Grossmeysterlarimiz uchrashuvida reytingi yuqoriroq bo'lgan SHamsiddin g'alaba qozonib, ochkolarini 4,5 taga etkazib oldi. Bugun Nodirbek Yakubboev (2668) ham muhim g'alabani qo'lga kiritdi. SHaxmatchimiz rossiyalik grossmeyster Mixail Nikitenko (2490)dan ustun keldi. Ikkinchi raqamli shaxmatchi Parham Maqsudlu (Eron, 2712) ham bugun g'alabaga erishdi. U rossiyalik Ivan Zemlyanskiyni taslim etdi.    

Oltinchi turdan so'ng yana peshqadam o'zgardi. Ortiq Nig'matov 5 ochko bilan qo'shimcha ko'rsatkichlarga ko'ra 1-o'ringa ko'tarilib oldi. Saha Nilash (Hindiston, 2458), Javohir Sindarov, Nihal Sarin (Hindiston, 2676) va Sankalp Gupta (Hindiston, 2539) hisobida ham 5 ochkodan bor. Nodirbek Abdusattorov 4,5 ochko bilan 6-o'rindan joy olgan.