Prezident Kubogi. SHaxmatda "o'zbek klassiko"si boshlandi. Sindarov Abdusattorovga qarshi!

Dunyoning ko'zga ko'ringan grossmeysterlari mukofot jamg'armasi 75 000 AQSH dollarini tashkil etuvchi Prezident Kubogi musobaqasi bosh sovrini uchun bahs olib borishyapti. Biroz avval turnirning 6-tur uchrashuvlari boshlandi. 

Turning markaziy partiyasi birinchi doskada 5-turdan so'ng peshqadamlikni qo'lga olgan Javohir Sindarov hamda musobaqaning birinchi tartib raqamli shaxmatchisi Nodirbek Abdusattorov o'rtasida o'tkazilyapti. Ikki shaxmatchini yarim ochko ajratib turibdi. Abdusattorov ketma-ket ikki durangdan keyin qo'shimcha ko'rsatkichlarga ko'ra 6-o'ringa tushib ketdi. 

Nodirbek Abdusattorov va Javohir Sindarov o'zaro 26 marotaba to'qnash kelishgan ekan. SHundan 9 tasida Nodirbek, 7 tasida Javohirning qo'li baland kelgan. O'nta partiyada durang natija qayd etilgan. Bugun 27-uchrashuv o'tkazilyapti. O'ziga xos "o'zbek klassiko"si!  

Musobaqani ko'tarinki ruhda o'tkazayotgan Ortiq Nig'matov (2447) ayni daqiqalarda eronlik grossmeyster Amin Tabatayi bilan oq donalarda o'ynayapti. U kecha 5-turda Nodirbek Abdusattorov (2777) bilan bahsda durangga imzo chekkandi. Yana bir o'zbek derbisida Muhiddin Madaminov va SHamsiddin Vohidov o'zaro hisob-kitob qilishyapti.  

Beshinchi turdan so'ng Javohir Sindarov 4,5 ochko bilan yakka peshqadam bo'lib turibdi. Sakkiz shaxmatchi - Ortiq Nig'matov, Murali Kartikyan, Saha Nilash, Nihal Sarin, Nodirbek Abdusattorov, Sankalp Gupta, Vitaliy Bernardskiy va Saparmirat Atabaev 4 ochkodan jamg'arishgan. Abdusattorov qo'shimcha ko'rsatkichlarga ko'ra 6-pog'onadan joy olgan.

"Prezident Kubogi". 6-turning markaziy partiyalari:

Nodirbek Abdusattorov (GM, 2777) – Javohir Sindarov (GM, 2682)  

Ortiq Nig'matov (IM, 2447) – Amin Tabatabaei (GM, 2688)  

Muhiddin Madaminov (IM, 2501) – SHamsiddin Vohidov (GM, 2681)  

Saparmirat Atabaev (IM, 2520) – Nihal Sarin (GM, 2676)

Sankalp Gupta (GM, 2539) – Murali Kartikeyan (GM, 2625)