Qilichbozlik. Paola va boshqa raqiblarini mag'lub etgan Dayibekova licenzion turnirda qatnashadigan bo'ldi + FOTO

Kecha mazkur turnir oldidan ichki saralash bahslari yakunlandi. Bu haqida MOQ matbuot xizmati xabar berdi. 

Xabar berganimizdek, murabbiylar shtabi eng kuchli raqobat yuzaga kelgan ayollar o'rtasidagi sablya yo'nalishida ana shunday musobaqa o'tkazishga qaror qilgan. 30 nafardan ortiq sablyachi qizlar raqobatida Zaynab Dayibekova, Sevinch Ismoilova, Paola Plieogo hamda Yana Obvinceva yarim finalga etib kelishdi.

Final uchun kechgan bahsda Zaynab Dayibekova Paola Pliegoni 15:9 hisobida mag'lubiyatga uchratgan bo'lsa, ikkinchi juftlikda Sevinch Ismoilova Yana Obvincevani dog'da qoldirdi. Hal qiluvchi bellashuvda esa Dayibekova o'z ustunligini namoyish qilib, licenzion musobaqada yurtimiz sharafini himoya qilish imkoniyatini qo'lga kiritdi.

Bellashuvlarni MOQ hamda O'zbekiston qilichbozlik federaciyasi raisi Rustam SHoabdurahmonov hamda Pan-Amerika qilichbozlik konfederaciyasida rahbarlik qilayotgan hamyurtimiz Vitaliy Logvin ham kuzatib borishdi va federaciya mutasaddilari bilan mazkur musobaqaga olib borilayotgan tayyorgarlik masalalari yuzasidan suhbatlashishdi.

Eslatib o'tamiz, bo'lajak licenzion musobaqada har bir yo'nalishda oltin medalni qo'lga kiritgan qilichbozlargina Tokio-2020 Olimpiya o'yinlariga yo'llanmani qo'lga kiritishadi.