Qoraqalpoq yoshlari orasida ommaviy sport targ'iboti yanada kuchaymoqda

MOQ vakili Mirsardor Alimov bir necha kun Qoraqalpog'istonda xizmat safarida bo'lib, Respublikaning bir nechta tumanlarida ommaviy sport targ'iboti bo'yicha qator ishlarni amalga oshirdi.

MOQ vakili dastavval “Sportni sev, sport bilan yasha!” ommaviy musobaqasining mart oyligi yakuni bo'yicha tashkil qilingan tadbirda ishtirok etdi. Undan so'ng 2003 yil va undan kichik yosh toifasida tashkil qilingan boks bo'yicha Qoraqalpog'iston chempionatida bo'ldi. Ushbu musobaqalar yakunida g'olib va sovrindorlarga MOQning esdalik sovg'alari taqdim qilindi.

SHundan so'ng Mo'ynoq yoshlari bilan ommaviy musobaqalar tashkil qilindi. «Talli o'zek» mahalla fuqarolar yig'inida joylashgan BO'SMda Mo'ynoq yoshlari o'rtasida yugurish, erga tayangan holatdagi mashq (otjimanie), uzunlikka sakrash, turnikda tortilish, voleybol kabi musobaqalar bo'lib o'tdi. Unda 500 nafardan ortiq ishtirokchi o'z omadini sinab ko'rdi. Tadbir yakunida ushbu BO'SMda mo'ynoqlik yoshlarning shug'ullanishi uchun 50 million so'mlik sport inventarlari taqdim qilindi.

SHundan so'ng Qoraqalpog'istonning ikki umidli yosh sportchilarining xonadoniga tashrif buyurildi. Ulardan biri karatechi Gulsanam Orazbaeva bo'lib, u Bo'zatov tumanida istiqomat qiladi. Tuman hokimligi mutasaddilari, Jismoniy tarbiya va sport vazirligi xodimlari bilan uning ijtimoiy vaziyati o'rganilib, yakunda uyi tamirlab beriladigan bo'ldi.

Mutasaddilar tashrif buyurgan navbatdagi manzil Xo'jayli tumanida istiqomat qiluvchi kurashchi Xadicha Najimovaning oilasi bo'ldi. Tadbirda Xo'jayli tumani hokimi Jenis Ermashev ham ishtirok etdi. Tashrif davomida uning ham oilaviy sharoiti o'rganilib, MOQ va hokimlikning sovg'alari taqdim qilindi.