27 may 08:03
Yangiliklar

SHaxmat

Qosimjonov 15 yoshli grossmeysterimizni enga olmadi, peshqadamlik qo'shnilarimizga o'tdi FOTOGALEREYA

Poytaxtimizdagi xalqaro shaxmat akademiyasida o'tkazilayotgan Jahon kubogi uchun Markaziy Osiyo saralash musobaqasi o'zining hal qiluvchi pallasiga kirdi.

Kecha kunning ikkinchi yarmida musobaqaning oltinchi tur uchrashuvlari o'tkazildi. Turnirda birinchi raqam ostida saralangan Rustam Qosimjonov ushbu turda oq donalarda harakat qildi. 17-jahon chempioni 15 yoshli xalqaro grossmeyterimiz Nodirbek Abdusattorov bilan durangga imzo chekdi.

Qosimjonovning ochko yo'qotishidan qozog'istonlik grossmeyster Rinat Jumaboev unumli foydalanib qoldi. Jumaboev qora donalarda o'ynashiga qaramay, hamyurtimiz SHamsiddin Vohidovni mag'lub etdi va 4,5 ochko bilan yakka peshqadamga aylanib oldi.

Bu turda yosh shaxmatchimiz Ortiq Nig'matov qozog'istonlik xalqaro grossmeyster Anuar Ismagambetov bilan durang qayd etdi. Xalqaro grossmeysterimiz Jahongir Vohidov esa qora donalarda o'ynab, qozog'istonlik xalqaro grossmeyster Nurlan Ibraevni taslim etdi.

Yosh grossmeysterimiz Javohir Sindarov tajribali grossmeyterimiz Marat Jumaevga yutqazib qo'ydi. Bugun 7-turda peshqadam Rinat Jumaboev hamyurtimiz Nodirbek Yoqubboevni sinovdan o'tkazadi. Rustam Qosimjonov qora donalarda Anuar Ismagambetov bilan hisob-kitob qiladi. Nodirbek Abdusattorov qozog'istonlik grossmeyster Pyotr Kostenkoga qarshi bahs olib boradi.

Bugungi partiyalar oldidan Rinat Jumaboev 4,5 ochko bilan yakka peshqadam bo'lib turibdi. Pyotr Kostenko, Rustam Qosimjonov, Ortiq Nig'matov, Nodirbek Abdusattorov, Nodirbek Yoqubboev va Anuar Ismagambetov hisobida 4 tadan ochko bor.