Qosimjonov yosh shaxmatchimizni enga olmadi, Nig'matov kuchli grossmeysterni mag'lub etdi FOTOGALEREYA

Kecha kunning ikkinchi yarmida musobaqaning to'rtinchi  tur uchrashuvlari o'tkazildi. Turnirda birinchi raqam ostida saralangan Rustam Qosimjonov ushbu turda qora donalarda harakat qildi. 17-jahon chempioni yosh shaxmatchimiz Nodirbek Yoqubboevni mag'lub eta olmadi va durangga rozi bo'ldi. 

Yosh shaxmatchimiz Ortiq Nig'matov esa kuchli o'yin namoyish etdi. U qozog'istonlik xalqaro grossmeyster, turnirning ikkinchi raqamli shaxmatchisi Rinat Jumaboevni mag'lubiyatga uchrata oldi. Ketma-ket uchta g'alabani qo'lga kiritgan Jumaboev to'rtinchi partiyaga kelib yutqazdi. 

Ortiq Nig'matov ushbu g'alabasi evaziga musobaqa jadvalida 3,5 ochko bilan yakka peshqadam bo'lib oldi. Yosh grossmeysterlarimiz Javohir Sindarov va Nodirbek Abdusattorov o'rtasidagi partiya durang bilan yakunlandi. 

Bugun 5-turda karvonboshi Ortiq Nig'matov qora donalarda grossmeyster Nodirbek Abdusattorovga qarshi bahs olib boradi. Uchtadan ochkoga ega Rustam Qosimjonov va Rinat Jumaboev bugun o'zaro hisob-kitob qilishadi. 

Suratlar muallifi - Alimurod Mamadaminov