Qoyil! Jahon chempionatida qatnashayotgan yagona ayol shaxmatchimiz amaldagi jahon chempionini mag'lub etdi

Ayollar o'rtasidagi dunyo birinchiligida yagona vakilamiz Afruza Hamdamova (2188) yurtimiz sharafini himoya qilmoqda. Yoshlar o'rtasida ikki karra jahon chempioni bo'lgan Afruza 8 imkoniyatdan 5,5 ochko jamg'arib, qo'shimcha ko'rsatkichlarga ko'ra 15-o'rinni egallab turibdi. To'qqizinchi pog'onadagi xitoylik grossmeyster Tan Jong Yi (2502) hisobida g'am 5,5 ochko bor.  

Hamdamova kecha tunda o'tkazilgan 4 ta turda 2 g'alaba, 1 durang va 1 mag'lubiyat qayd etdi. Afruza 7-turda qora donalarda o'ynaganiga qaramay, ikki karra jahon chempioni, blic yo'nalishida amaldagi jahon chempioni rossiyalik Valentina Gunina (FIDE, 2388)ni mag'lub etishni uddaladi. U 8-turda qozog'istonlik grossmeyster, blic yo'nalishida ikki karra jahon chempioni Bibisara Assaubaeva (2444) bilan durang o'ynadi. Beshinchi turda ruminiyalik Irina Bulmaga (2378)dan ustun keldi.  

Turnir jadvalida 8 imkoniyatdan 6,5 ochko jamg'argan xitoylik Ju Venjun (2536) qo'shimcha ko'rsatkichlarga ko'ra peshqadamlik qilmoqda. Hindistonliklar Harika Dronovalli (2416) va Hampi Koneru (2431) hisobida ham 6,5 ochko bor. Katerina Lagno (FIDE, 2433), Yip Karissa (AQSH, 2389), Aleksandra Kostenyuk (SHveycariya, 2486), Elizabet Paetz (Germaniya, 2406) va Stavrula Tsolakidou (Greciya, 2381) 6 ochkodan bor. 

AQSH sharafini himoya qilayotgan Gulruhbegim Tohirjonova 8 imkoniyatdan 4 ochko jamg'arib, qo'shimcha ko'rsatkichlarga ko'ra 33-pog'onadan 63-o'ringa tushib ketdi. U 3 g'alaba, 2 durang va 3 ta mag'lubiyat qayd etgan.