Rafael Nadal: "Alkarazning Madriddagi g'alabasi men uchun syurpriz bo'lmadi"

"U allaqachon Mayami va Barselonadagi turnirda g'alaba qozongan. To'g'risini aytsam, Madriddagi g'alaba men uchun katta syurpriz bo'lmadi. U uchun xursandman. Uning ayni damda o'ziga qanchalik ishonishi va qay darajaga chiqa olishi hammaga tushunarli. 

Yurtimizda uzoq vaqt o'ynay oladigan ajoyib tennischi paydo bo'lganidan xursandman. Ayniqsa, uyda g'alaba qozonish har doim yoqimli. Bu uning uchun Madriddagi o'zgacha hafta bo'lsa kerak", - dedi Nadal.

Nadal, shuningdek, "Rolan Garros"-2022'da bu yil birinchi marta Novak Jokovich bilan bitta “Katta Dubulg'a” turnirida ishtirok etishini izohladi.

"Menimcha, bu unchalik katta ahamiyatga ega emas. Tennis Novak va mendan ko'ra muhimroq. CHempionlik uchun kurasha oladigan tennischilar ko'p. Bundan 5-10 yil oldingidek, uch-to'rt nafar tennischi chempionlik uchun kurashadigandek tuyulayotgandir, ammo hammada imkoniyat bor. Menimcha, bugungi kunda vaziyat boshqacha.

Muxlislar meni, Rojer va Novakni kortda ko'rishni afzal bilishadi. Turnirda eng kuchlilar ishtirok etsa, har doim yaxshi. Ammo, vaziyat o'zgarmoqda, biz ham qariyapmiz. Yangi avlod kuchayib bormoqda. "Rolan Garros" muhim turnir. O'ylashimcha, chempionlikni qo'lga kiritish uchun ko'pchilikda imkoniyat bor".