Respublika engil atletika markazi ishga tushirildi

Sport yuksak madaniyat, vatanparvarlik tuyg'ularini shakllantirishda ham muhim o'rin tutadi. Bu sohada erishilgan yutuqlar mamlakatni dunyoga tanitadi, barcha yurtdoshlarga g'urur-iftixor bag'ishlaydi. Mustaqillik yillarida jismoniy tarbiya va sport bilan muntazam shug'ullanish uchun zarur sharoitlar yaratildi. SHahar va qishloqlarda zamonaviy sport komplekslari bunyod etildi.

O'zbekiston Respublikasi Prezidenti SHavkat Mirziyoev raisligida 31 oktyabr kuni jismoniy tarbiya va sport sohasida boshqarish tizimini takomillashtirish, ommaviy sportni rivojlantirish, iqtidorli sportchilarni tanlash va tarbiyalash, sohani malakali kadrlar bilan mustahkamlash hamda zamonaviy sport inshootlarni barpo etish masalalariga bag'ishlangan yig'ilishda mamlakatimiz sportchilarini nufuzli musobaqalar, jumladan, Olimpiya va Paralimpiya o'yinlariga puxta tayyorlash masalalari ham muhokama qilindi.

Yig'ilishda xalqaro musobaqalarda qo'lga kiritilayotgan medallar faqat boks, dzyudo, og'ir atletika va sport kurashlari bilan chegaralanib qolayotgani tanqid ostiga olindi. Gimnastika, trampolin, engil atletika, taekvondo, baydarka va kanoeda eshkak eshish, velosport kabi boshqa salohiyatli sport turlari bo'yicha ham ko'proq yutuqlarga erishish yuzasidan aniq choralar belgilab berildi. Ular orasida Toshkentda Respublika engil atletika markazini ishga tushirish hamda undan samarali foydalanishga etibor qaratildi.
Engil atletika markazini bunyod etish to'g'risidagi qaror O'zbekiston Respublikasining Birinchi Prezidenti Islom Karimov tomonidan 2013 yil 25 fevralda imzolangan va qurilish uchun masul sifatida “O'zbekneftegaz” milliy xolding kompaniyasi belgilangan edi. Markaz binosiga birinchi g'ishtni Xalqaro engil atletika federaciyasi birinchi-vice prezidenti, afsonaviy sportchi Sergey Bubka qo'ygani etiborga molik.

Bugungi kunda Markaziy Osiyoda yagona bo'lgan va barcha zamonaviy talablarga javob beradigan engil atletika markazi foydalanishga topshirilmoqda. Yugurish yo'lkalari dunyoga mashhur “Konika” kompaniyasi mahsuloti bo'lsa, asbob-anjom va uskunalar boshqa bir mashhur kompaniya “Nordik” tomonidan etkazib berilgan.

Markazda sportchilarning shug'ullanishi, yashashi, musobaqalashishi uchun shart-sharoit mavjud. Ommaviy axborot vositalari, shu jumladan televidenie orqali bevosita reportajlar uyushtirish uchun imkoniyatlar yaratilgan. Endilikda mamlakat engil atletika federaciyasi shu erda joylashadi va ushbu sport turini rivojlantirishni yanada yuksak saviyaga ko'tarish uchun barcha choralarni ko'radi.

O'zbekiston engil atletika maktabi o'zining ajoyib ananalariga ega. Bir qator sportchilarimiz xalqaro musobaqalarda shohsupaga ko'tarilib, bayrog'imiz baland hilpirashiga sababchi bo'lishgan. Jumladan, 2000-yillarning o'zida Leonid Andreev va Svetlana Radzivil o'smirlar o'rtasida jahon chempioni unvonini qo'lga kiritishdi, Go'zal Xubbieva, Nadiya Do'sanova kabi sportchilarimiz Osiyo o'yinlari va qita chempionatlarida oltin medalga sazovor bo'lishdi.
Yangi engil atletika markazi ana shu ajoyib yulduzlarning vorislarini voyaga etkazishda, nufuzli xalqaro musobaqalarda muvaffaqiyatli ishtirok etadigan sportchilar zaxirasini tayyorlashda munosib hissa qo'shishga imkoniyat yaratadi.

Markazning tantanali ochilish marosimida O'zbekiston Respublikasi jismoniy tarbiya va sport davlat qo'mitasi raisi Rustam Qurbonov, sport faxriysi Ozod Ro'zmetov, o'smirlar o'rtasida jahon chempioni, Osiyo o'yinlari va ko'plab nufuzli xalqaro musobaqalar g'olibasi Svetlana Radzivil so'zga chiqib, bunday ajoyib shart-sharoit yaratilishiga sababchi bo'lgan davlatimiz rahbariyati, bunyodkorlik ishlariga hissa qo'shgan barcha-barchaga minnatdorchilik izhor qilishdi hamda ushbu markaz yangi yorqin g'alabalar uchun zamin hozirlashiga umid bildirishdi.