Rustam Qosimjonov asosiy raqiblaridan birini mag'lub etdi

Kecha kunning ikkinchi yarmida musobaqaning uchinchi  tur uchrashuvlari o'tkazildi. Turnirda birinchi raqam ostida saralangan Rustam Qosimjonov ushbu turda muhim g'alabalaridan birini qo'lga kiritdi. 17-jahon chempioni oq donalarda qozog'istonlik xalqaro grossmeyster Pyotr Kostenkoni taslim etdi va ochkolarini 2,5taga etkazib oldi. 

Qozog'istonlik yana bir xalqaro grossmeyster Rinat Jumaboev ketma-ket uchinchi g'alabasiga erishdi va turnir jadvalida yakka peshqadam bo'lib oldi. Jumaboev o'zi singari mag'lubiyatsiz odimlayotgan vatandoshi Murtaz Kajgaleevdan ustun keldi. 

Hamyurtlarimiz Tohir Vohidov va Nodirbek Yoqubboev bahsida durang qayd etildi. Yosh xalqaro grossmeysterimiz Jahongir Vohidov qora donalarda o'ynashiga qaramay, tojikistonlik Muhammad Xusanxo'jaevni engdi. Tajribali grossmeysterimiz Marat Jumaev Elbek Jumanovga yutqazib qo'ydi. Yana bir yosh grossmeyterimiz Javohir Sindarov qora donalarda afg'onistonlik Safi Ahmadni mag'lubiyatga uchratdi. 

Bugun 4-turda Rustam Qosimjonov qora donalarda Nodirbek Yoqubboev bilan munosabatlariga oydinlik kiritib oladi. Peshqadam Rinat Jumaboev hamyurtimiz Ortiq Nig'matovga qarshi qorada donalarda harakat qiladi. Yosh grossmeysterlarimiz Javohir Sindarov va Nodirbek Abdusattorov o'rtasidagi partiya ham ko'pchilikning diqqat etiborida bo'ladi.