Saytimiz bosh muharriri Yilning eng faol sport jurnalisti tanlovida taqdirlandi

 Unda shunday jumlalar bor: «Ommaviy axborot vositalari mamlakatimizda amalga oshirilayotgan keng ko'lamli o'zgarish va yangilanish jarayonlarini har tomonlama tahlil qilib, joylardagi ijtimoiy muammolar, xato va kamchiliklarga davlat idoralari va jamoatchilik etiborini qaratayotganini alohida qayd etish lozim».

Jismoniy tarbiya va sport vazirligi ham jismoniy tarbiya va sport sohasida amalga oshirilayotgan davlat siyosatini faol targ'ib etish, mamlakatimiz aholisi, xususan yoshlar orasida sog'lom turmush tarzini keng ommalashtirish yo'lida fidokorona xizmat qilib kelayotgan ommaviy axborot vositalari xodimlari, jurnalist hamda blogerlarning mehnatini yuksak qadrlaydi.

27 iyun – Matbuot va ommaviy axborot vositalari xodimlari kuni munosabati bilan 2004 yildan buyon vazirlik tomonidan «Yilning eng faol sport jurnalisti» ijodiy tanlovi o'tkazib kelinadi va uning g'oliblari har safar jurnalistlarning kasb bayrami arafasida taqdirlanadi. Bu safar ham shunday bo'ldi.

Bugun Jismoniy tarbiya va sport vazirligida o'tkazilgan tadbirda joriy yilgi ijodiy tanlov g'oliblari bilan bir qatorda sport tadbirlari va musobaqalari, xalqaro arenalarda O'zbekiston sharafini munosib himoya qilib kelayotgan sportchilar va ularning ustozlari, sport talim muassasalari va inshootlari faoliyatini faol yoritib kelayotgan OAV xodimlari ishtirok etdi.

Tadbirda Jismoniy tarbiya va sport vazirining birinchi o'rinbosari Ravshan Ermatov ham ishtirok etdi va jurnalistlarni kasb bayrami bilan muborakbod etdi.

- Barchangizni Matbuot va ommaviy axborot vositalari xodimlari kuni bilan vazirligimiz nomidan samimiy qutlayman. Sizlar biz uchun tabir joiz bo'lsa oyna vazifasini o'tab bermoqdasiz. Sportchilarimiz qaerlarda xatoga yo'l qo'yishmoqda, yana nimalarga ahamiyat qaratish lozim, sportimizdagi muammolar nimadan iborat? Bu kabi savollarga kerak bo'lsa mutaxassislardan avval jurnalistlarimiz etibor qaratishmoqda. Bir so'z bilan aytganda, bugungi muvaffaqiyatlarimiz zamirida siz jurnalistlarning ham hissangiz beqiyos, - dedi Ravshan Sayfiddinovich.
 

«Yilning eng faol sport jurnalisti» tanloviga qiziqish bu yil har qachongidan yuqori bo'ldi. Hakamlar hayati ham g'olib va sovrindorlarni aniqlashda qiynalishdi. Yakunda tanlovning g'olib va sovrindorlari uchligi qo'yidagicha ko'rinish oldi.

1-o'rin: Akbarali Allaev – «Sport» telekanali bosh muharrir o'rinbosari;

2-o'rin: Kamoliddin Alimov – www.olamsport.com sayti bosh muharriri;

3-o'rin: To'lqin Ro'ziev – «Yangi O'zbekiston» gazetasi muxbiri.

SHuningdek, tadbirda yil davomida jismoniy tarbiya va sportni faol targ'ib qilib kelayotgan bir guruh jurnalist va ijodkorlar “Jismoniy tarbiya va sport alochisi: ko'krak nishoni hamda vazirlikning esdalik sovg'alari bilan taqdirlanishdi.

Jismoniy tarbiya va sport vazirligi Matbuot xizmati