Sayyoramizning 4 mlrd aholisini o'ziga rom etgan sport turi O'zbekistonda ham ommalashadi FOTOGALEREYA

Poytaxtimizdagi Milliy matbuot markazida O'zbekiston kriket federaciyasi raisi Aziz Mixliev, Xalqaro kriket kengashining Osiyo mamlakatlarida kriketni rivojlantirish bo'limi boshlig'i, oliy toifali xalqaro ekspert, janob Iqbol Sikander hamda shu tashkilot menejeri Nitesha Kotariy bilan ommaviy axborot vositalari xodimlari o'rtasida qisqa muloqot bo'lib o'tdi.

Ommaviyligi jihatidan futboldan keyin ikkinchi o'rinda turuvchi va bugungi kunga kelib jahonning 4 milliarddan ortiq aholisining sevimli sport turiga aylangan kriket mamlakatimizda ham ommalashib bormoqda. Ayni kungacha  kriket bo'yicha 15 ta jamoa faoliyat olib bormoqda.

SHuningdek, turli sohalarda mehnat qilayotgan chet ellik mutaxassislardan iborat bo'lgan 2 ta jamoa ham shakllanib bo'lgan.

Mamlakatimizda mehmon bo'lib turgan soha mutaxasislaridan iborat guruh azolari O'zbekistonda kriket sport turining rivojlanish imkoniyatlari, omma o'rtasida bu sportga bo'lgan qiziqishni o'rganishmoqda.

Safar taassurotlari hamda kriketning mamlakatimizda rivojlanish jarayonlari haqidagi xulosalar xalqaro kengash rahbariyatiga taqdim etilgach, O'zbekiston kriket federaciyasining xalqaro va Osiyo kriket kengashi azoligiga qabul qilinish masalasi ko'rib chiqiladi.

Alimurod MAMADAMINOV, o'z muxbirimiz