Sebastyan Fettel mavsum oxirida Formula-1dagi faoliyatini yakunlashini malum qildi

«Oxirgi 15 yil davomida «Formula-1»da ajoyib insonlar bilan ishlash sharafiga muyassar bo'ldim. Bularning barchasi uchun ularga rahmat aytmoqchiman. Men so'nggi ikki yil davomida «Aston Martin» sharafini himoya qilib kelyapman va natijalarimiz biz kutgandek yaxshi bo'lmasada, jamoa kelgusi yillarda eng yuqori saviyada bo'lishiga ishonaman. 

Bunday ajoyib odamlar guruhi bilan ishlash menga yoqdi. Lourens, Lens, Martin, Mayk, rahbarlar, muhandislar, mexaniklar va jamoaning qolgan azolari - men ularga eng yaxshi tilaklarimni tilayman. Umid qilamanki, o'tgan yili qilgan va bu yil davom ettirayotgan ishlarim jamoa rivojiga yordam beradi. Qolgan o'nta Gran-prida bor kuchimni sarflayman.

Ketish qarori men uchun qiyin bo'ldi, bu haqda ko'p o'yladim. Yil oxirida men nimaga etibor qaratishim kerak bo'lsa shunga ko'proq vaqt ajratmoqchiman. Men ota sifatida oilam bilan ko'proq vaqt o'tkazishni xohlayman.

Lekin bugun men xayrlashuv haqida gapirmoqchi emasman. Men barchaga, shu jumladan, qo'llab-quvvatlashlarsiz «Formula-1» bo'la olmaydigan muxlislarga rahmat aytmoqchiman», - deya Fettelning so'zlarini keltiradi «Aston Martin» matbuot xizmati.

Eslatib o'tamiz, Fettel to'rt marta jahon chempioni bo'lgan. Ortda qolgan 16 ta «Formula-1» mavsumida 289 ta startda u 53 marta g'alaba qozongan va 122 marta shohsupaga ko'tarilgan.