Sensaciya davom etadi. Fomin "CHellenjer" turniri finalida!

"CHellenjer" turkumiga kiruvchi ushbu musobaqada istedodli tennischimiz Sergey Fomin ham muvaffaqiyatli ishtirok etyapti. Hamyurtimiz hozirgina yakuniga etgan yarim final uchrashuvida dunyoning 261-raketkasi, AQSH vakili Emilio Navani 6/4, 5/7, tay-brekda 7/6(7/5) hisobida mag'lubiyatga uchratdi. 

Uchrashuv 2 soatu 26 daqiqa davom etgan. Nava bahs davomida 9 ta, Fomin esa 5 ta eys zarbani amalga oshirdi. Amerikalik tennischi ikkinchi davrada turnirning birinchi raketkasi, ATP reytingida 237-pog'onadan joy olib turgan rossiyalik Aleksandr SHevchenkoni 6/3, 6/4 hisobida taslim etgan edi. 

Taqqoslash uchun, Sergey Fomin ATP reytingida 838-pog'onadan joy olgan. Hamyurtimiz ilk davrada reytingda o'zidan 460 pog'ona yuqorida borayotgan rossiyalik Alibek Kachmazovni 6/1 7/6, nimchorak finalda yana bir reytingi yuqori tennischi, germaniyalik Sebastyan Fanzelovni 6/3, 6/3, chorak final uchrashuvida esa turnirning 4-raketkasi, dunyo reytingida 285-pog'onadan joy olib turgan yaponiyalik Kaichi Uchidani 5/7, 6/3, 6/4 hisobida dog'da qoldirgandi. 

Eslatib o'tamiz, Fomin mag'lub etgan Fanzelov Denis Istominni musobaqadan chiqarib yuborgan edi.