Sergey Fomin yutqazmadi, lekin ishtirokini to'xtatdi

Mukofot jamg'armasi 25 000 AQSH dollarini tashkil etuvchi ushbu musobaqada hamyurtimiz Sergey Fomin ham o'z imkoniyatini sinab ko'rdi. Afsuski, jarohat sabab kambek qila olgan uchrashuvini davom ettira olmadi. 

Mamlakatimizning ikkinchi raketkasi yaponiyalik Takuya Kumasakaga qarshi kortga chiqdi. Ikki soatu 21 daqiqa davom etgan uchrashuvning birinchi seti 7/5 hisobida Kunchiqar yurt tennischisi foydasiga hal bo'ldi. Ikkinchi setni 1/4 hisobida boy berayotgan Fomin o'yinga qaytdi va tay-brekda muvozanatni tikladi - 7/6(6). Hal qiluvchi uchinchi set 1/1 bo'lib turgan bir paytda Sergey jarohat sabab bahsi to'xtatishga majbur bo'ldi.   

Taqqoslash uchun, Sergey Fomin ATP reytingida 577, Takuya Kumasaka esa 521-pog'onadan joy olgan. Yaponiyalik tennischi omad sababli keyingi bosqichga yo'l oldi.