SHamsiddin o'ziga kelmoqda, ikki shaxmatchimiz chempionlik uchun kurashga qo'shildi

Bu yil o'z tarixida 18-marotaba tashkil etilayotgan, mukofot jamg'armasi 75 000 AQSH dollarini tashkil qiluvchi turnir shveycarcha tizimda 10 turdan iborat bo'ladi. Ishtirokchilar ikki guruhda sovrinli o'rinlar uchun bahs olib borishyapti. Asosiy hisoblangan A guruhida 1800 va undan yuqori reytingli shaxmatchilar jam bo'lgan. V guruhida esa reytingi 1999 va undan past bo'lgan ishtirokchilar dona suryapti va unda hamyurtlarimiz peshqadamlik qilishmoqda. 

Kuchlilar jam bo'lgan A guruhida hindistonlik xalqaro grossmeyster Nihal Sarin (2687) birinchi raqam ostida saralangan bo'lib, u 8-turda birinchi taxtada hamyurti Puranik Abhimanyu (2636)ga qarshi qora donalarda durang o'ynadi. Ikkinchi raqamli shaxmatchi sifatida tasniflangan yosh grossmeysterimiz SHamsiddin Vohidov (2670) nihoyat chempionlik uchun kurashga qo'shildi. U o'zbek derbisida Saidakbar Saydaliev (2461)ni mag'lubiyatga uchratdi.   

Grossmeysterimiz Abdumalik Abdusalimov (2525) qora donalarda mo'g'ulistonlik SHugar Gan-Erdenega yutqazib qo'ydi. Humoyun Begmuratov (2430) qora donalarda o'ynashiga qaramay, niderlandiyalik grossmeyster Sergey Tivyakov bilan durang o'ynadi. CHempionlik uchun kurashayotgan turkmanistonlik Saparmirat Atabaev (2529) qora donalarda vengriyalik Sanan Syugirov (2631)ga imkoniyatni boy berdi. 

Yana bir o'zbek derbisida Almas Rahmatullaev (2413) grossmeysterlikka davogar Muhammadzohid Suyarov (2474)ni taslim eta oldi. Hamyurtlarimizdan Davron SHaripov (2246), Muhiddin Madaminov (2550), Marat Jumaev (2352) 8-turda zafar quchishdi. Grossmeysterimiz Ortiq Nig'matov (2501) esa kutilmaganda qozog'istonlik master Imangali Axilbay (2342)ga yutqazib qo'ydi.

Sakkizinchi turdan so'ng to'rt shaxmatchi 6,5 tadan ochko jamg'arib, turnir jadvalida Top-4`likdan joy olgan. Sanan Syugirov qo'shimcha ko'rsatkichlarga ko'ra peshqadamlik qilyapti. Olti nafar ishtirokchi 6 ochkodan to'plagan. Ular orasida SHamsiddin Vohidov va Almas Rahmatullaev ham bor. Hamyurtlarimiz qo'shimcha ko'rsatkichlarga ko'ra, mos ravishda 8 va 10-o'rinlarni band etishgan. 

Bugun 9-turda yuqori to'rtlikda borayotgan grossmeysterlar o'zaro o'yish o'tkazishadi. SHamsiddin Vohidov qora donalarda o'zi singari 6 ochkoga ega turkmanistonlik Saparmirat Atabaevga qarshi bahs olib boradi. Humoyun Begmuratov esa oq donalarda hindistonlik grossmeyster Leon Mendonka bilan hisob-kitob qiladi. Bugungi tur uchrashuvlari ham soat 15:00da boshlanadi.