SHarjadagi shaxmat turniri g'olibi Nodirbek Yoqubboev yurtimizga qaytib keldi

O'z tarixida 27-marotaba tashkil etilgan ananaviy turnir rapid va blis yo'nalishlarida o'tkazildi. Unda dunyoning 35 davlatidan 200 nafardan ortiq mahoratli shaxmatchi g'oliblik uchun dona surishganligi musobaqaning nufuzi ancha yuqori ekanligidan darak beradi.

Blic yo'nalishidagi turnirda xalqaro grossmeyster Nodirbek Yoqubboev 9 imkoniyatdan 8 ochko jamg'arib, oltin medal va kubok bilan taqdirlandi. U 7 o'yinda g'alaba qozongan bo'lsa, ikki nafar raqibi bilan durangga erishdi. Yoqubboev hattoki arab davlatlari orasida eng kuchli shaxmatchi, «Ramadan Open» xalqaro turnirining birinchi raqamli ishtirokchisi bo'lmish BAA vakili Salim Solihdan ham ustun keldi.

Bugun tunda hamyurtimiz Nodirbek Yoqubboev O'zbekiston shaxmat federaciyasi raisining birinchi o'rinbosari Xusan Turdaliev boshchiligida yurtimizga qaytib keldi. Islom Karimov nomidagi Toshkent xalqaro aeroportida shaxmatchilarimizni Sportni rivojlantirish vazirligi masul xodimlari, O'zbekiston shaxmat federaciyasi rahbariyati hamda ommaviy axborot vositalari xodimlari kutib olishdi.

Eslatib o'tamiz, «Ramadan open» xalqaro turnirida yana bir xalqaro grossmeysterimiz Javohir Sindorov ham qatnashib, blis yo'nalishida 3-o'rinni egallagan edi.

SHuningdek, xalqaro turnirda O'zbekiston sharafini Nilufar Yoqubboeva hamda SHaxnoza Sobirovalar ham himoya qilishdi.