SHaxmat kunlari festivalida 6 yoshli bolakay xalqaro grossmeyster bilan durang o'ynadi

Guliston shahrida joylashgan «Bilimdonlar maskani»da o'tkazilgan ushbu tadbirda shaxmat bo'yicha O'zbekiston terma jamoasi bosh murabbiyi, xalqaro grossmeyster Saydali Yo'ldoshev ishtirok etdi.

Sport tadbirida shaxmat ixlosmandlari taniqli grossmeyster bilan shaxmat musobaqasida o'zaro bahs yuritishdi. Uch soat davom etgan festival yakunida shaxmat bo'yicha O'zbekiston yoshlar terma jamoasi azolari, Sardoba tumanidan Bahrom Baxrillaev, Bobir Eshboev, Yangier shahridan Diyorbek Raimjonovlar Saydali Yo'ldoshevdan ustun kelishgan bo'lsa, barcha muxlislarning olqishiga sazovor bo'lgan gulistonlik 6 yoshli Lazizbek SHavkatov tajribali ustoz murabbiyga qarshi kechgan bahsda durangga imzo chekdi. Bu esa yurtimizdan yana bir yosh istedod sohibi etishib chiqayotganidan darak bermoqda.

Musobaqa so'ngida faol ishtirokchilarga Sirdaryo viloyati hokimligi tomonidan tasis etilgan tashakkurnoma va esdalik sovg'alari taqdim etildi.