SHaxmat. Tohirjonova - muddatidan avval O'zbekiston chempioni!

Aylana tarzda o'tkazilayotgan xotin-qiz shaxmatchilar musobaqasida ikki xalqaro grossmeyster - Gulruhbegim Tohirjonova (2349, chempionatning birinchi raqamli ishtirokchisi) va Sarvinoz Qurbonboeva (2219) g'oliblik uchun asosiy davogar sifatida etirof etilyapti. 

O'zbekiston chempioni nomi musobaqa yakunlanishiga bir tur qolganida aniq bo'ldi. Sakkizinchi partiyada Tohirjonova qora donalarda o'ynashiga qaramay, yoshlar o'rtasida Osiyo chempioni Bahora Abdusattorovani mag'lubiyatga uchratdi va bu bilan muddatidan avval mamlakat chempioniga aylandi. 

Gulruhbegim 8ta uchrashuvdan 7tasida g'alabaga erishdi. Faqat Irina Gevorgyan bilan durang qayd etdi. Uchinchi o'ringa tushib qolgan Sarvinoz Qurbonboeva qora donalarda harakat qilib, Nilufar Yoqubboeva bilan murosaga keldi. 

Endilikda sobiq mamlakat chempioniga aylangan Nodira Nodirjonova Irina Gevorgyanni mag'lubiyatga uchratdi. Sevara Boymurodova Marjona O'ktamovaga yutqazib qo'ydi. So'nggi tur oldidan Tohirjonova 8 imkoniyatdan 7,5 ochko jamg'argan. Kechagi g'alabadan so'ng Nodira Nodijonova 6 ochko bilan ikkinchi o'ringa ko'tarilib oldi. Qurbonboeva hisobida 5,5 ochko bor.