SHaxmatchi qizlarimiz Singapore International Open turnirida dona surishyapti

A va V guruhlarida tashkil etilayotgan musobaqada dunyoning 40 ga yaqin davlatlari qatori o'zbekistonlik shaxmatchi qizlar ham o'z imkoniyatlarini sinovdan o'tkazishyapti. Ular orasida isteodli shaxmatchimiz Guldona Karimova (2115) etakchilar safida bormoqda. 

Kuchlilar jam bo'lgan A guruhi bahslarida qatnashayotgan Guldona 3 imkoniyatdan 2,5 ochko jamg'arib, qo'shimcha ko'rsatkichlarga ko'ra 11-o'rinni egallab turibdi. Ikkinchi o'rindagi hindistonlik Seturaman hisobida ham 2,5 ochko bor. Kecha Guldona 3-turda italiyalik grossmeyster Alessio Valsekki (2478)ni mag'lub etishni uddaladi. 

Afsuski, Butunjahon shaxmat Olimpiadasida shov-shuv ko'targan qizlarimizning hozircha Singapur turnirida omadi kelmayapti. Tajribali Nodira Nodirjonova (2137) oq donalarda filippinlik Emmanuel Garsiya (2397)ga, Umida Omonova qora donalarda hindistonlik Ra Harikrishnan (2473)ga imkoniyatni boy berib qo'ydi. 

Uzoq muddatdan keyin katta shaxmatga qaytgan Nodirjonova Butunjahon shaxmat Olimpiadasida muvaffaqiyatli tarzda qatnashib, o'z doskasida kumush medalni qo'lga kiritgandi. 

Uchinchi turda shaxmatchi qizlarimizdan Barchinoy SHokirjonova va Asal Salimova raqiblari bilan durang o'ynashdi. Marjona Malikova vetnamlik Min Nguendan, Nilufarxon Imomqo'zieva angliyalik Sidxart Gopakumardan ustun keldi. Bugun Guldona Karimova 4-turda qora donalarda o'zi singari 2,5 ochkoga ega rossiyalik Mixail Kobaliyaga qarshi bahs olib boradi.