Sindarov qatnashayotgan Grand Chess Tour: Sinquefield Cup 2026 turnirida 5-tur ortda qoldi

Dunyoning ko'zga ko'ringan grossmeysterlari ishtirok etayotgan turnir klassik shaxmat yo'nalishida 9 turdan iborat aylanma tizimida o'tkazilyapti. Beshinchi turda Javohir Sindarov amerikalik Sem Sevianga qarshi oq donalarda o'ynab, durang natija qayd etdi. 

Bu turda ikkita g'alaba qayd etildi. Amerikalik Fabiano Karuana hamyurti Levon Aronyanni, germaniyalik Vinsent Keymer niderlandiyalik Anish Girini oq donalarda mag'lubiyatga uchratdi. Qolgan partiyalar durang natija bilan yakunlandi. 

Beshinchi turdan so'ng Uesli So 5 imkoniyatdan 3,5 ochko jamg'arib, yakka peshqadamlik qilyapti. To'rt nafar ishtirokchi - Fabiano Karuana, Vinsent Keymer, Rameshbabu Praggnanandha, Maksim Vashe-Lagrav 3 ochkodan jamg'arib, Top-5`talikdan joy olgan. Levon Aronyan va Sem Sevian hisobida 2,5 ochkodan bor. Javohir Sindarov 2 ochko bilan 8-pog'onada bormoqda. Anish Giri 1,5 ochko bilan 9, 1 ochkoga ega Yorden van Forest esa so'nggi 10-o'rindan joy olgan.

Bugun turnirda dam olish kuni sifatida elon qilingan. Ertaga o'tkaziladigan 6-turda Javohir Sindarov qora donalarda Fabiano Karuanaga qarshi bahs olib boradi. Ertangi uchrashuvlar ham bizning vaqt bilan soat 22:00da boshlanadi. 

To'liq ishtirokchilar tarkibi: Javohir Sindarov (O'zbekiston), Fabiano Karuana (AQSH), Pragnanandhaa Rameshbabu (Hindiston), Uesli So (AQSH), Levon Aronyan (AQSH), Anish Giri (Niderlandiya), Vinsent Keymer (Germaniya), Maksim Vashe-Lagrav (Franciya), Yorden van Forest (Niderlandiya), Sem Sevyan (AQSH).