Singapore International Open. Mag'lubiyatsiz tur. Guldona yana bir grossmeyster bilan durang o'ynadi, qolganlarda g'alaba!

A va V guruhlarida tashkil etilayotgan musobaqada dunyoning 40 ga yaqin davlat sportchilari qatori o'zbekistonlik shaxmatchi qizlar ham o'z imkoniyatini sinovdan o'tkazyapti. Ular orasida isteodli shaxmatchimiz Guldona Karimova (2115) etakchilar safida bormoqda. Kecha shaxmatchimiz oq donalarda mo'g'ulistonlik grossmeyster Sumiya Bilguun bilan murosaga keldi. 

Kuchlilar jam bo'lgan A guruhi bahslarida qatnashayotgan Guldona 5 imkoniyatdan 3,5 ochko jamg'arib, qo'shimcha ko'rsatkichlarga ko'ra 24-o'rinni egallab turibdi. Hindistonlik Ilamparti 5-turdan keyin 4,5 ochko bilan yakka peshqadam bo'lib oldi. SHu turgacha karvonboshi bo'lib kelgan rossiyalik grossmeyster Volodar Murzin 4 ochko bilan qo'shimcha koeficentlarga ko'ra 2-o'rinni band etgan. Yana 19 nafar shaxmatchi hisobida ham 4 ochkodan bor. 

Butunjahon shaxmat Olimpiadasida o'z doskasida kumush medalni qo'lga kiritgan Nodira Nodirjonova (2137) ketma-ket ikkinchi g'alabasini qo'lga kiritdi. Tajribali shaxmatchimiz oq donalarda singapurlik Venkata Daneshdan ustun kelib, ochkolarini 3 taga etkazib oldi. Umida Omonova qora donalarda o'ynashiga qaramay, xitoylik Yuxu Jouni taslim etdi. Qora donalarda o'ynagan Barchinoy SHokirjonova hindistonlik Devansh Singhni mag'lubiyatga uchratdi.  

Beshinchi turda shaxmatchi qizlarimizdan birgina Nilufarxon Imomqo'zieva ochko yo'qotdi. U oq donalarda harakat qilib, avstraliyalik Kris CHan bilan durang o'ynadi. Asal Salimova esa qora donalarda hindistonlik Kirtikani engdi. 

Oltinchi tur oldidan Barchinoy SHokirjonova qo'shimcha ko'rsatkichlarga ko'ra 97, Nodira Nodirjonova 107, Umida Omonova 127, Asal Salimova 150-o'rinni egallab turibdi.