Singapore International Open. SHaxmatchi qizlarimizda g'alabasiz tur, eng yaxshi natijamiz hozircha 66-o'rin!

A va V guruhlarida tashkil etilayotgan musobaqada dunyoning 40 ga yaqin davlati sportchilari qatori o'zbekistonlik shaxmatchi qizlar ham o'z imkoniyatini sinovdan o'tkazyapti. Isteodli shaxmatchimiz Guldona Karimova (2115) musobaqadagi ishtirokini yaxshi boshlagan edi. Ammo u ketma-ket uchta turda mag'lubiyat alamini totib ko'rdi. Kecha u 8-turda hindistonlik Abjihet Nishantga imkoniyatni boy berdi.   

Butunjahon shaxmat Olimpiadasida o'z doskasida kumush medalni qo'lga kiritgan Nodira Nodirjonova (2137) ketma-ket ikki g'alabadan keyin mag'lubiyatga uchradi. Tajribali shaxmatchimiz oq donalarda o'ynashiga qaramay, singapurlik Jayden Vongga yutqazib qo'ydi. Umida Omonova oq donalarda vetnamlik Day Xuong bilan durang o'ynadi. Barchinoy SHokirjonova filippinlik Ruelle Kanino bilan murosaga keldi. 

Nilufarxon Imomqo'zieva malayziyalik Mohan Kevin, Asal Salimova indoneziyalik Arif Rahmon bilan durang qayd etdi. Marjona Malikova esa mezbon shaxmatchi Jay Aditiya Gnanasekarga imkoniyatni boy berdi.  

Kuchlilar jam bo'lgan A guruhi bahslaridagi hozircha eng yaxshi natijamizga Umida Omonova erishib turibdi. Terma jamoamiz azosi 8 imkoniyatdan 5 ochko to'plab, qo'shimcha ko'rsatkichlarga ko'ra 66-pog'onadan joy olgan. Turnir jadvalining 38-pog'onasidagi serbiyalik Teodora Injach hisobida ham 5 ochko bor. 

So'nggi 9-tur oldidan Nodira Nodirjonova (4,5 ochko) qo'shimcha ko'rsatkichlarga ko'ra 88, Barchinoy SHokirjonova (4,5 ochko) 101, Asal Salimova (4 ochko) 140-o'rinni egallab turibdi. Guldona Karimova hisobida 3,5 ochko bor.