Singapore International Open turniri yakunlandi. SHaxmatchi qizlarimiz nechanchi o'rinlarni band etishdi?

A va V guruhlarida tashkil etilgan musobaqada dunyoning 40 ga yaqin davlati sportchilari qatori o'zbekistonlik shaxmatchi qizlar ham o'z imkoniyatini sinovdan o'tkazishdi. Istedodli shaxmatchimiz Guldona Karimova (2115) musobaqadagi ishtirokini g'alaba bila yakunladi. U ketma-ket uchta mag'lubiyatdan keyin so'nggi 9-turda avstraliyalik Jeremi O`kerrolni mag'lubiyatga uchratdi. 

Butunjahon shaxmat Olimpiadasida o'z doskasida kumush medalni qo'lga kiritgan Nodira Nodirjonova (2137) qatorasiga ikkinchi mag'lubiyatini qabul qilib oldi. Tajribali shaxmatchimiz 9-turda qora donalarda o'ynab, hindistonlik Rauhlga yutqazib qo'ydi. Umida Omonova (2168) ham mag'lub bo'ldi. U qora donalarda vetnamlik Gia Bannga imkoniyatni boy berdi. Barchinoy SHokirjonova (2033) hindistonlik Krishnan Saravanadan engildi. 

Nilufarxon Imomqo'zieva (1883) ham musobaqadagi ishtirokini mag'lubiyat bilan tugatdi. Asal Salimovada g'alaba, Marjona Malikovaning partiyasida esa durang natija bo'ldi. Kuchlilar jam bo'lgan A guruhi bahslaridagi eng yaxshi natijamizga Umida Omonova erishdi. Terma jamoamiz azosi 9 imkoniyatdan 5 ochko to'plab, qo'shimcha ko'rsatkichlarga ko'ra 91-pog'onadan joy oldi. 

Asal Salimova (5 ochko) qo'shimcha ko'rsatkichlarga ko'ra 109, Guldona Karimova (4,5 ochko) 120, Nodira Nodirjonova (4,5 ochko) 123, Barchinoy SHokirjonova (4,5 ochko) 131-o'rin bilan musobaqadagi ishtirokini yakunladi.