Sinner - dunyoning 21 yoshgacha bo'lgan eng kuchli tennischisi!

Reyting bo'yicha dunyoning eng kuchli sakkiz nafar tennischisi ishtirok etgan turnirda mezbon raketka ustasi Yannik Sinner bosh sovrin sohibiga aylandi. Dunyo reytingida 95-pog'onadan joy olib turgan italiyalik 18 yoshli tennischi final uchrashuvida sayyoramizning 18-raketkasi, avstraliyalik Aleks Di Minaurni mag'lub etishning uddasidan chiqdi. 

Yannik Sinner 1 soatu 4 daqiqa davom etgan bahsda kuchli raqibidan 4/2, 4/1, 4/2 hisobida ustun keldi. 18 yoshli Sinner ham, 20 yashar Minaur ham uchrashuv davomida 2 tadan eys zarbasini amalga oshirishdi. Bu tennischilarning o'zaro ilk uchrashuvi edi. Next Gen ATP Finals turniridagi muvaffaqiyatli ishtirok Sinnerga 372 ming dollar keltirdi.