Sirdaryoda “Workout” va “Streetbol” tushunchalari ommalashmoqda

Bugungi kunda aholini ommaviy sportga keng jalb etish maqsadida keng ko'lamli ishlar amalga oshirilmoqda. Jumladan, O'zbekiston Respublikasi Prezidentining «Sog'lom turmush tarzini keng tatbiq etish va ommaviy sportni yanada rivojlantirish chora-tadbirlari to'g'risida»gi Farmonida sportning ustuvor turlari sifatida belgilangan “Workout”, “Streetbol” (ko'cha fitnesi) va badminton sport turlarini rivojlantirish maqsadida maxsus maydonchalar qurilib, ommaviy musobaqalar o'tkazilmoqda.

SHu maqsadda Sirdaryo viloyatining barcha tuman (shahar)larida joylashgan mahallalarda sport maydonchalari barpo etilib, foydalanishga topshirilmoqda. Hozirga qadar hududda jami 46ta “Workout”, “Streetbol” va badminton maydonlari qurib bitkazildi. Qo'shimcha yana 37ta mahallada sport maydonlarini qurish ishlari amalga oshirilmoqda. Yil yakuniga qadar viloyatda mavjud 224ta mahallaning 168tasida sport maydonlari tashkil etilib, aholi ixtiyoriga topshirilishi rejalashtirilgan.