Sirdaryoliklar Yangi yilni ham sport bilan qarshi olishdi

Xususan, viloyat aholisi Yangi yilni ham ommaviy sport tadbirlari bilan qarshi oldi.

Sirdaryo viloyat Jismoniy tarbiya va sport boshqarmasi tomonidan O'zbekiston Respublikasi Prezidentining 2020 yil 30 oktyabrdagi «Sog'lom turmush tarzini keng tatbiq etish va ommaviy sportni yanada rivojlantirish chora-tadbirlari to'g'risida»gi Farmoni ijrosini taminlash hamda Jismoniy tarbiya va sport vazirligi tashabbusi bilan tashkil etilgan «Yangi yilga sport bilan!” ommaviy sport festivali musobaqalarini tuman (shahar)larda ham uyushqoqlik bilan o'tkazish maqsadida Guliston, Boyovut, Oqoltin va Mirzaobod tumanlaridagi tashkilotlarda faoliyat yuritayotgan xodimlar o'rtasida mini-futbol va voleybol musobaqalari tashkil etilgan bo'lsa, Sayxunobod tumanida mahallalarda istiqomat qilayotgan fuqarolar, nuroniylar hamda xotin-qizlar o'rtasida shaxmat-shashka musobaqalari o'tkazildi.

SHuningdek, talim muassasalaridagi qishki tatil kunlarida yoshlarning bo'sh vaqtlarini mazmunli tashkil etish, ularni jismoniy tarbiya va sportga jalb etish maqsadida Xovost tumanida sportning basketbol, badminton, badiiy gimnastika, boks va yakka kurash turlari bo'yicha festivallar tashkil etildi. Mazkur sport tadbirlariga 400 nafardan ortiq ishtirokchi jalb qilindi.

Mini-futbol musobaqalarida huquqni muhofaza qilish organlari xodimlari etakchilik qilishgan bo'lsa, voleybol bo'yicha Xalq talimi tizimi xodimlariga bas keladigan raqib topilmadi.

Sayxunobod tumanida o'tkazilgan shaxmat-shashka musobaqalarida tumanning «Do'stlik», «Paxtabod» va «Gulbuloq» mahallalari jamoalari sovrindorlar qatoridan joy olishdi.

Ommaviy sport tadbirlari yakunida g'olib va sovrindorlar, shu bilan birga festivalning faol ishtirokchilari tashkilotchilar tomonidan munosib tarzda rag'batlantirildi.

Qolaversa, Jismoniy tarbiya va sport vazirligi hamda Ichki ishlar vazirligi qo'shma qarori ijrosini taminlash maqsadida Mirzaobod tumanida ichki ishlar xodimlarining jismoniy tarbiya va sport bilan muntazam shug'ullanishlari uchun qulaylik yaratish maqsadida ularga sport formalari taqdim etildi.