Sport sohasida 2020 yil yakunlari va 2021 yil uchun istiqbolli rejalar muhokama qilindi

Yig'ilish avvalida Toshkent viloyati hokimining Turizm va sport masalalari bo'yicha o'rinbosari Sayfiddin Nizomov so'zga chiqib, hokimlik va sport bo'limlarini aloqasini qay tarzda to'g'ri yo'lga qo'yish hamda 2021 yilda qilinadigan ishlar, jumladan, viloyatning barcha hududlaridagi Jismoniy tarbiya va sport bo'limlariga qo'yiladigan talablar va ishlar qay yo'sinda amalga oshirilishi haqida to'xtalib o'tdi.

SHundan so'ng, viloyat Jismoniy tarbiya va sport boshqarmasi boshlig'i Komil Adilov so'zga chiqib, Toshkent viloyatida 2020 yil mobaynida Jismoniy tarbiya va sport sohasida amalga oshirilgan yutuq va kamchiliklar haqida gapirib o'tdi.

SHuningdek, boshqarma boshlig'i K.Adilov kelgusi 2021 yilda viloyatda sportni yanada ommalashtirish yo'lida ko'proq ish olib borish kerakligi, erishilgan yutuqlar bilan chegaralanib qolmasdan, har bir yo'nalishda kamchiliklarni imkon boricha bartaraf qilish zarurligi, viloyatning barcha sport rahbarlari birdamlikda harakat qilish kerakligi, kelajak o'sib kelayotgan yoshlarga xar tomonlama o'rnak bo'lish zarurligi haqida takidlab o'tdi.

Yig'ilishda so'zga chiqqan boshqarma boshlig'i o'rinbosari Jamoliddin Sadullaxo'jaev yil davomida qilingan ishlar, o'tkazilgan tadbirlar ayniqsa karantin davrida aholi, xususan, yoshlarning bo'sh vaqtini mazmunli o'tkazish maqsadida tashkil etilgan onlayn sport musobaqalari, karantin qoidalariga qatiy rioya qilgan holda «yashil» hududlarda sportning 42 ta turi bo'yicha sport tadbirlari hamda badantarbiya mashg'ulotlari o'tkazilganligi va sport targ'iboti bo'yicha viloyatning Respublikada eng yaxshi uchlikda qayd etilganligini takidladi.

Yig'ilishda shuningdek bo'lim boshliqlari, buxgalteriya va boshqarmaning boshqa xodimlarining yillik hisobotlari tinglandi.

Yakunda Toshkent viloyatida sport sohasida o'zini yaxshi tomonlama ko'rsatgan sport bo'limlari, bolalar-o'smirlar sport maktablari, viloyat federaciyalari xodimlariga Jismoniy tarbiya va sport boshqarmasining maxsus sovg'alari topshirildi.