Ikki rus jamoasini mag'lub etgan "Toshkent" "SHaharlar jangi" musobaqasining 4-bosqich g'olibi sifatida 5 mln dollarlik Superfinalga yo'l oldi + FOTOGALEREYA

O'n sakkiz yoshgacha bo'lgan dzyudochilardan iborat jamoalar o'rtasida tashkil etilayotgan ushbu musobaqaga sakkizta shahar mezbonlik qilishi belgilangan edi. Poytaxtimizdagi Olimpiya shaharchasi turnirning to'rtinchi bosqichiga mezbonlik qildi. 

Turnir qoidasiga ko'ra, Oliy divizionning sakkizta mintaqasi g'oliblari va kumush medal sohiblari Superfinalga to'g'ridan-to'g'ri yo'llanma oladilar. Uchinchi va to'rtinchi o'rinni egallagan jamoalar esa finalga chiqish uchun xalqaro saralash turnirlarida kurashni davom ettiradilar. Har bir turnirda to'rtta jamoa (ikkitasi mezbon) ishtirok etadi.

"SHaharlar jangi" xalqaro seriyasi 23 sentyabr kuni Qozog'istonning Ostona shahrida boshlandi. Keyin esa Belarusning Minsk, Qirg'iz Respublikasining Bishkek shaharlarida navatdagi bosqich bahslari o'tkazildi. 

Poytaxtimiz mezbonlik qilgan to'rtinchi bosqichda "Toshkent", "Xorazm" hamda Rossiyaning "Troick" va "Tyumen" jamoalari o'zaro bahslashdi. 

Musobaqaga faxriy mehmon sifatida Rossiya dzyudo federaciyasi vice-prezidenti Valentin Xabirov tashrif buyurdi.

Natijalarga to'xtaladigan bo'lsak, "Toshkent" jamoasi "Xorazm" dzyudochilarini 13:8, "Tyumen"ni 13:4, "Troick"ni esa 13:4 hisobida engib, to'rtinchi mintaqa g'olibi sifatida umumiy mukofot jamg'armasi 5 million AQSH dollarini tashkil etuvchi Superfinalga yo'l oldi. "SHaharlar jangi" Gran-Pri finali 2027 yilning 15-24 yanvar kunlari BAAda o'tkaziladi.  

Saralashning qolgan bahslari oktyabr va noyabr oylarida Armanistonning Erevan, Mo'g'ulistonning Ulan-Bator, Turkiyaning Istanbul shaharlarida o'tkaziladi. Xalqaro saralash seriyasi esa Serbiya poytaxti Belgrad shahrida yakunlanadi.