Sportchilarimiz V Islom birdamlik o'yinlariga ko'tarinki ruhda kuzatib qo'yildi

Bugun, 6 avgust kuni Milliy Olimpiya qo'mitasi binosida V Islom birdamlik o'yinlarida ishtirok etuvchi O'zbekiston delegaciyasi musobaqaga ko'tarinki ruhda kuzatib qo'yildi.

IV Islom birdamligi o'yinlarida O'zbekiston delegaciyasi 121 nafar sportchi bilan qatnashgan bo'lsa, bu gal 265 nafar atlet Turkiyaga yo'l olmoqda.

Rasmiy kuzatish marosimida O'zbekiston Respublikasi Prezidenti maslahatchisi Abdujabbor Abduvohidov, Sportni rivojlantirish vaziri Adxam Ikramov, vazir o'rinbosari SHaxrullo Maxmudov, Madaniyat vaziri Ozodbek Nazarbekov, MOQ Bosh kotibi Oybek Kasimov, MOQ raisi o'rinbosari Ravshan Ermatov, Milliy Paralimpiya qo'mitasi raisi Muxtorxon Tashxodjaev, mutasaddilar, sportchilarning ota-onalari hamda OAV xodimlari ishtirok etishdi.

Marosimni O'zbekiston Respublikasi Prezidenti maslahatchisi Abdujabbor Abduvohidov ochib berdi.

Mutasaddilar sportchilariga mazkur musobaqada omad tilashdi.

SHundan so'ng, mamlakatimiz sport delegaciyasining bayroqdori, qilichbozlik bo'yicha yoshlar o'rtasidagi jahon chempionati sovrindori Zaynab Dayibekovaga O'zbekiston bayrog'ini tantanali ravishda topshirildi.

SHu tariqa, O'zbekiston delegaciyasi V Islom birdamlik o'yinlariga kuzatib qo'yildi.

Malumot uchun, kecha V Islom birdamlik o'yinlarida musobaqa rasmiy ochilishidan oldin velosport bo'ycha bellashuvlarga start berilgan edi. Quvonarlisi, musobaqadagi ilk medal bizni uzoq kuttirmadi. Yani velosport bo'yicha hamyurtimiz Sofiya Karimova V Islom birdamlik o'yinlarida bronza medalni qo'lga kiritdi.

Eslatib o'tamiz, V Islom birdamlik o'yinlarida dunyoning 55 ta mamlakatidan sportchilarning ishtirok etishi kutilmoqda. O'yinlar Turkiyaning Konya shahridagi 8ta inshootda o'tkaziladi.