Sportchilarimizning tibbiy ko'rikdan o'tishlari uchun yangi qulayliklar yaratildi

O'zbekiston Milliy Olimpiya qo'mitasi qoshida tashkil etilgan Respublika sport tibbiyoti ilmiy-amaliy markazi atletlarimiz uchun qulayliklar yaratish maqsadida bir qator qo'shimcha o'zgarishlarni amalga oshirdi.

Bu borada Markaz laboratoriyasi yangi texnika bilan boyiganini takidlash joiz. U orqali endilikda atletlarimizning umumiy qon tahlillari avvalgidan ancha ko'p parametrlarda ko'rib chiqiladi. SHuningdek, turkiyalik mutaxassislar bilan hamkorlikdagi ishlar orqali sport genetikasi tekshiruvidagi yo'nalishlar ham ko'paydi.

MOQ rahbariyati mazkur texnikalar qanday xizmat ko'rsatayotgani o'rganish maqsadida Markaz faoliyati bilan tanishdi. RSTIAM direktori Kamol Sirojitdinov Qo'mita Bosh kotibi Oybek Kasimov, MOQ raisi o'rinbosari SHerzod Tashmatov, O'zbekiston sport faxriylari kengashi raisi Bahodir Maxsitovga yangi jihozlarning qanday ishlashi va ularning imkoniyatlari haqida batafsil malumot berdi.

Sportchilarimiz uchun yana bir qulaylik. Endilikda ular tibbiy ko'rikdan o'tadigan asosiy yo'nalishlar bir joyda to'plandi. Ilgari atletlarimiz tor doiradagi mutaxassislar ko'rigidan o'tishgach, Markazning ko'plab qavatlarida navbatma navbat yurishar edi. Yangi o'zgarishdan so'ng laboratoriya, barcha turdagi funkcional tekshiruv xonalari bir joyda birlashtirildi.

MOQ rahbariyati sportchilarimiz uchun yaratilgan ushbu qulayliklar haqida ijobiy fikr bildirib, mazkur yo'nalishdagi ishlarni yanada takomillashtirish bo'yicha qo'shimcha tavsiyalarini berdi. Ahamiyatlisi, ushbu tibbiy jihozlar kelgusida nafaqat sportchilar, balki hamyurtlarimiz uchun ham xizmat ko'rsatishi mumkin.