“Sportni sev, sport bilan yasha!”: Musobaqada Bosh vazir o'rinbosari hozir bo'ldi

Samarqandda «Sportni sev, sport bilan yasha!» Respublika ommaviy sport musobaqasining viloyat final bosqichi start oldi.

Musobaqaning ochilish marosimida O'zbekiston Respublikasi Bosh vazirining o'rinbosari A.Abduhakimov, viloyat hokimining o'rinbosari B.Nurullaev, viloyat jismoniy tarbiya va sport boshqarmasi boshlig'i SH.Rizaev, xalq talimi boshqarmasi boshlig'i, viloyat shaxmat federaciyasi raisi Z.SHodievalar ishtirok etishdi.

Marosimda so'zga chiqqanlar keyingi yillarda mamlakatimizda shaxmatni ommalashtirishga alohida etibor qaratilayotgani, xususan ushbu musobaqa 2021 yil 14 yanvardagi «SHaxmatni yanada rivojlantirish va ommaviylashtirish hamda shaxmatchilarni tayyorlash tizimini takomillashtirish chora-tadbirlari to'g'risida»gi Prezident Qarori ijrosini taminlashga xizmat qilishi, qolaversa shaxmatni ommalashtirish orqali mamlakatimizda sport bilan muntazam shug'ullanayotgan aholi qamrovini oshirishga erishilishini ham takidlashdi.

«Sportni sev, sport bilan yasha!» shiori ostidagi ommaviy sport festivali doirasida Samarqand viloyatida yanvar oyi «SHaxmat-shashka oyligi» etib belgilangan edi. Mazkur oylik doirasida viloyat bo'yicha o'tkazilgan shaxmat musobaqasining tuman (shahar) bosqichida hududdagi 492 ta mahalladan 5 385 nafar o'g'il-qizlar g'oliblik uchun dona surishdi.

Musobaqaning tuman (shahar) bosqichlarida g'oliblikni qo'lga kiritgan 200 nafardan ortiq yoshlar bugun Jismoniy tarbiya va sport vazirligi tasarrufidagi Samarqand olimpiya zaxiralari kollejida shaxmat bo'yicha o'z qobiliyatlarini namoyon etishmoqda.