Sultonov CHandigarhda, u turnirning birinchi raketkasi!

Mukofot jamg'armasi 15 000 dollarni tashkil etuvchi turnirda hamyurtimiz Humoyun Sultonov ham o'z imkoniyatini sinovdan o'tkazmoqda. Mamlakatimizning birinchi raketkasi kecha juftlikdagi ishtirokini g'alaba bilan boshladi. 

Bugun esa u yakkalikning ilk davrasida kortga chiqadi. CHandigarh turnirida birinchi raqam ostida tasniflangan Sultonov 1/16 finalda hindistonlik Manish Sureshkumar bilan hisob-kitob qiladi. 

Taqqoslash uchun, Humoyun ATP reytingida 331, Manish esa 877-pog'onadan joy olgan. Qizig'i, tennischilar o'tgan hafta Nyu-Delidagi turnirning birinchi bosqichida ham o'zaro to'qnash kelishgandi. O'shanda Sultonov reytingda o'zidan 548 pog'ona quyida borayotgan Sureshkumarga 6/4, 5/7, 4/6 hisobida yutqazib qo'ygandi.