Sultonov Monca turnirida dunyoning 91-raketkasiga qarshi uch setlik uchrashuv o'tkazdi

Mukofot jamg'armasi 145 250 evroni tashkil etuvchi musobaqada hamyurtimiz Humoyun Sultonov zaxira o'yinchisi sifatida bahslarga kirishgandi. Mamlakatimizning birinchi raketkasi ilk davrada reytingda o'zidan yuqorida turgan slovakiyalik 27 yoshli Lukas Kleynni 6/1, 6/3 hisobida mag'lubiyatga uchratgan edi. 

Hozirgina yakuniga etgan 1/8 final bahsida hamyurtimiz turnirning birinchi raketkasi, dunyo reytingida 91-o'rinni egallab turgan belgiyalik Rafael Kollinonga qarshi kortga chiqdi. Birinchi set 6/2 hisobida belgiyalik foydasiga hal bo'ldi. Ikkinchi setda Humoyun breyk evaziga setni yutib oldi - 6/4. Hal qiluvchi uchinchi setda Sultonov kuchli raqibiga qarshilik ko'rsata olmadi - 0/6.     

Taqqoslash uchun, Sultonov ATP reytingida 229-o'rinni egallab turibdi. Bir soatu 56 daqiqa davom etgan bahsda Humoyun 3, Kollinon 8 ta eys zarbasini amalga oshirdi. Qo'shxatolar evropalik tennischida ko'proq bo'ldi 4 ga 2. Bu tennischilarning o'zaro o'tkazgan uchinchi uchrashuvi bo'ldi. Bundan avvalgi ikki bahsda tennischilar bittadan g'alabaga erishishgandi. Bugun Rafael hisobda oldinga chiqib oldi - 2:1.